الماتىلىق اتا-انا اۋىر قىلمىسقا باردى. ولار پەرزەنتحانادا جورگەگىنە ورانىپ، كوزىن جاڭا اشقان ءسابيىن ساۋدالاپ جاتقان جەرىنەن ۇستالدى. المالى اۋدانىنىڭ پوليتسيا قىزمەتى ولاردى قىلمىس ۇستىندە قۇرىقتادى، دەپ حابارلايدى "ادىرنا" ۇلتتىق پورتالى.
ءساۋبيدى ساۋداعا سالىپ، تارازىعا تارتپاق بولعان اتا-اناعا قاتىستى الماتى قالالىق پد ۇيىمداسقان قىلمىسقا قارسى كۇرەس باسقارماسىنىڭ باستىعى جانات نۇرعاليەۆ بىلاي دەپ مالىمدەمە جاسادى:
"1998 جىلى تۋعان ب. ەسىمدى ايەل مەن ونىڭ كۇيەۋى 1991 جىلى تۋعان ب. ەسىمدى ازامات ۇستالدى. بىرنەشە ساعات بۇرىن ايەل پەرزەنتحانادان شىققان. ولار سول جەردەن بىردەن مامىلە جاساۋعا كەتكەن. ولار قىزىن 2 ملن تەڭگەگە باعالاعان. ايتا كەتۋ كەرەك، ەرلى-زايىپتىلار تۋىلماعان بالا ءۇشىن “الەۋەتتى اتا-انانى” الدىن الا ىزدەگەن. جاڭا تۋعان نارەستەنى ساتۋدان تۇسكەن اقشا ايىپتالۋشىلاردى ۇستاۋ كەزىندە تاركىلەندى. ءىس سوتقا دەيىنگى تەرگەۋدىڭ بىرىڭعاي تىزىلىمىندە قر قك-ءنىڭ 135 بابى 2 بولىگى (كامەلەتكە تولماعاندار ساۋداسى) بويىنشا تىركەلگەن قىلمىستىق ءىس ماتەريالدارىنا قوسىلدى. قىلمىستىق ءىس اياسىندا جەدەل-تەرگەۋ شارالارى جۇرگىزىلىپ جاتىر", - دەدى مامان.
سونىمەن قاتار، كوپەس ەرلى-زايىپتىلاردىڭ ەكى بالاسى بارى انىقتالدى. ولار اۋىر قىلمىسقا بارعاندارىن اشىق مويىنداپ وتىر.
"ادىرنا" ۇلتتىق پورتالى
