شىمكەنتتە سوڭعى ءۇش جىلدا كوممۋنالدىق تولەم باعاسى تومەندەگەن

1948
Adyrna.kz Telegram
شىمكەنت قالاسىنىڭ اكىمى مۇرات ايتەنوۆ قر ۇەم تابيعي مونوپوليالاردى رەتتەۋ كوميتەتىنىڭ شىمكەنت قالاسى فيليالى دەپارتامەنتىنىڭ باسشىسىن قابىلداپ، سالاداعى وزەكتى ماسەلەلەردى تالقىلادى.
دەپارتامەنت باسشىسى تاريفتەردى تۇراقتاندىرۋ بويىنشا جارتىجىلدىقتا اتقارىلعان جۇمىس جونىندە باياندادى. ونىڭ ايتۋىنشا، شىمكەنت قالاسىندا 75 قىزمەت ءتۇرى بويىنشا 59 تابيعي مونوپوليا سۋبەكتىسى ەنگىزىلگەن. ولار ەلەكتر ەنەرگياسىن جانە گاز تاسىمالداۋ، جىلۋمەن قامتاماسىز ەتۋ، سۋمەن جابدىقتاۋ جانە سۋ بۇرۋ قىزمەتى، كىرمە جولدارى باعىتىندا جۇمىس جاسايدى.
2019 جىلدان باستاپ كەيبىر كوممۋنالدىق تاريفتەردىڭ تومەندەۋى بايقالادى. جىلۋمەن جابدىقتاۋ 2018 جىلى 142,31 تگ بولسا، سوڭعى ءۇش جىلدا 110,78 تگ بولىپ تۇراقتالعان. سۋمەن جابدىقتاۋ 97,97 تگ بولسا، قازىر 88,17 تگ. سۋدى بۇرۋ 39,03 تەڭگەدەن 35,13 تەڭگەگە تۇسكەن. گازبەن جادىقتاۋ ءۇش جىل الدىن 34,47 تگ، قازىر 31,59 تگ بولعان. 2019-2021 ج. كوممۋنالدىق تاريفتەردى تومەندەۋى ناتيجەسىندە تۇتىنۋشىلاردىڭ ۇنەمدەلگەن قارجىلارى 9,76 ملرد.تەڭگە قۇراپ، تۇرعىندارعا كەرى قايتارىلعان.
وسى جارتى جىلدىقتا تۇرعىنداردىڭ ارىزدارى بويىنشا جوسپاردان تىس 10 تەكسەرۋ جۇمىستارى جۇرگىزىلگەن. "ناتيجەسىندە 51 نۇسقاما ەنگىزىلىپ، 23 اكىمشىلىك قۇقىقبۇزۋشىلىق قوزعالعان. ولارعا 41,9 ملن.تگ. ايىپپۇل سالىنىپ، تۇتىنۋشىلاردان ارتىق الىنعان 3,39 ملن.تەڭگە تولىق قايتارىلدى" دەيدى سالا باسشىسى.
«تابيعي مونوپوليا تۋرالى» قر زاڭعا سايكەس، تاريف بەس جانە ودان كوپ جىل مەرزىمگە بەلگىلەنەدى. وسىعان وراي بەكىتىلگەن تاريفتەردىڭ مەرزىمى بىتۋىنە بايلانىستى – 3 تابيعي مونوپوليانىڭ 2021-2026 جىلدارعا جاڭا تاريفتەرى بەكىتىلگەنىن جەتكىزدى. دەپارتامەنت تاراپىنان 2019 جىلدان بەرى 1 ميلليوننان اسا ادامنىڭ قۇقىعى قورعالعان.
دەپارتامەنت جۇمىسىنا قانىققان شىمكەنت اكىمى مونوپوليست مەكەمەلەرمەن كەلىسسوزدەر جۇرگىزىپ، باعا تۇراقتىلىعىن ساقتاۋدى جانە ولارعا باقىلاۋدى كۇشەيتۋدى تاپسىردى. «ايكومەك-109» ورتالىعىنا كەلىپ تۇسەتىن ارىز-شاعىمداردىڭ باسىم بولىگى دە وسى كوممۋنالدىق قىزمەتكە قاتىستى بولعاندىقتان، ساپالى قىزمەت كورسەتۋگە بارىنشا نازار اۋدارۋ قاجەتتىگىن ايتتى.
پىكىرلەر