شىمكەنت قالاسىندا حالىقارالىق ستاندارتتارعا ساي جەدەل مەديتسينالىق جاردەم كورسەتۋ ستانتسياسىنىڭ «Call» ورتالىعى اشىلدى. قالاعا جۇمىس ساپارىمەن كەلگەن قر پارلامەنتى سەناتىنىڭ دەپۋتاتتارى نۇرلان بەكنازاروۆ پەن ايگۇل قاپباروۆا جانە قر دەنساۋلىق ساقتاۋ ۆيتسە-ءمينيسترى اجار عينيات ورتالىقتىڭ جۇمىسىمەن تانىستى، دەپ حابارلايدى قازاقپارات ءتىلشىسى.
جاڭا وزگەرىستەرگە سايكەس، ستانۋيانىڭ 103 نومىرىنە تۇسەتىن قوڭىراۋلاردىڭ بارلىعىن ديسپەتچەرلەر جاڭادان اشىلعان ورتالىقتا قابىلدايتىن بولادى. سونداي-اق، بىرىڭعاي اۆتوماتتاندىرىلعان جۇيە ارقىلى باقىلاي الادى. بۇگىندە قوڭىراۋ قابىلداۋ ورىندارى ەكى ەسەگە ارتقان. ناتيجەسىندە قالا تۇرعىندارى ەش كەدەرگىسىز جەدەل جاردەم نومىرىنە حابارلاسىپ، مامانداردى شاقىرتا الادى. ورتالىقتاعى قوڭىراۋلاردى باسقارۋ ءۇشىن PRI ارناسىنىڭ ۇزدىكسىز بايلانىس جەلىسى مەن سپۋتنيكتىك باقىلاۋ جۇيەسى (GPS) جانە ءموبيلدى ينتەرنەت تەحنولوگياسى قولدانىلادى. بىرىكتىرىلگەن جۇيە ارقىلى وپەراتورلار 10 سەكۋند ىشىندە شاقىرتۋدى بريگاداعا باعىتتايدى. سونداي-اق اقپاراتتىق جۇيەنىڭ كومەگىمەن قالانىڭ كارتاسى بويىنشا مەكەنجايلاردى ىزدەۋ، كولىك باعىتتارىنىڭ كارتالارىن قاداعالاۋ، كۇتۋ ۋاقىتى، قوزعالىس جىلدامدىعى تۋرالى مالىمەتتەردى اۆتوماتتى تۇردە باقىلاۋعا بولادى. ال، شاقىرتۋدا جۇرگەن مامانداردىڭ جۇمىسىن باقىلاۋ ءۇشىن 100 جەدەل جاردەم كولىگىندەگى قىزمەتكەردىڭ بارىنە جاڭا پلانشەت بەرىلگەن. ايتا كەتەيىك، قالا اكىمدىگى مەن «مەيدەي قازاقستان» تۇرىك كومپانياسى اراسىندا جەدەل جاردەم قىزمەتىن جاڭعىرتۋ جوباسى اياسىندا ەكى جاقتى مەموراندۋمعا قول قويىلعان بولاتىن. كەلىسسوزدەر ناتيجەسىندە ءبىرىنشى كەزەڭدە جەدەل جاردەم قىزمەتىنە 100 جاڭا كولىك بەرىلگەن. ەكىنشى كەزەڭدە وسى جوبا اياسىندا «Call» ورتالىعى الەمدىك ستاندارتتار بويىنشا جاڭعىرتىلىپ وتىر.
