قىتايدىڭ Xiamen Wanli Stone Co.، Ltd كومپانياسى جامبىل وبلىسىنداعى قورداي موليبدەن-ۋران پوليمەتالل كەن ورنىن بارلاۋ جوباسىنا 1,8 ميلليون دوللار ينۆەستيتسيا سالۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى قارجى ساراپشىسى ارمان باتاەۆ Finmentor.kz تەلەگرام-ارناسىندا جازىپ، قىتاي قور بيرجاسىنىڭ سايتىنداعى قۇجاتقا سىلتەمە جاسادى.
ونىڭ ايتۋىنشا، Xiamen Wanli Stone كومپانيالار توبى Hainan Zhong-Kazakh Wanli Stone Mining Co. اتتى بىرلەسكەن كاسىپورىن قۇرىپ، قازاقستانداعى «سپەتسپوستاۆكا — ابسوليۋت» جشس-ءىن ساتىپ الادى.
«سپەتسپوستاۆكا — ابسوليۋت» جشس-ءنىڭ جامبىل وبلىسىندا سيرەك كەزدەسەتىن، ءتۇستى جانە باعالى مەتالداردى بارلاۋعا ليتسەنزياسى بار. مامىلەنىڭ نەگىزگى اكتيۆى – قورداي موليبدەن-ۋران كەن ورنى، ونى دامىتۋ جانە ونەركاسىپتىك وندىرىسكە ەنگىزۋ جوسپارلانىپ وتىر", – دەپ اتاپ ءوتتى ارمان باتاەۆ.
ايتا كەتەيىك، «سپەتسپوستاۆكا — ابسوليۋت» جشس 20 جىلدان استام ۋاقىتتان بەرى جۇمىس ىستەيدى، الماتى قالاسىندا شاعىن كاسىپورىن رەتىندە تىركەلگەن. قۇرىلتايشىلارى – يرينا گولۋب پەن انتون مەركۋلوۆ. رەسمي انىقتامادا نەگىزگى قىزمەتى «باعدارلامالىق قامتاماسىز ەتۋدى سۇيەمەلدەۋ» دەپ كورسەتىلگەن.
ال Xiamen Wanli Stone كومپانياسى 1996 جىلى قىتايدىڭ سيامىن قالاسىندا قۇرىلعان.
