مەملەكەت باسشىسى، قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ قورعانىس ءمينيسترى داۋرەن قوسانوۆتى قابىلدادى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
كەزدەسۋ بارىسىندا پرەزيدەنتكە قورعانىس ۆەدومستۆوسىنىڭ 2025 جىلى اتقارعان قىزمەتى تۋرالى ەسەپ ۇسىنىلدى. مينيستر اسكەردىڭ جاۋىنگەرلىك ازىرلىك دەڭگەيى، قارۋلى كۇشتەردى دامىتۋدىڭ نەگىزگى باسىم باعىتتارى جونىندە باياندادى.
سونداي-اق داۋرەن قوسانوۆ تسيفرلىق تەحنولوگيالاردى ەنگىزۋ، اسكەري-پاتريوتتىق تاربيە جۇمىستارى، قورعانىس ينفراقۇرىلىمىن جەتىلدىرۋ شارالارى تۋرالى اقپارات بەردى. بۇدان بولەك، پرەزيدەنتتىڭ قارۋلى كۇشتەر قاتارىندا ءتارتىپ ورناتۋ جونىندەگى تاپسىرماسىنىڭ ورىندالۋ بارىسى تانىستىرىلدى.
كەزدەسۋ قورىتىندىسىندا قاسىم-جومارت توقاەۆ اسكەردىڭ جاۋىنگەرلىك ازىرلىگىن ارتتىرۋ، اسكەري جانە قۇقىقتىق ءتارتىپتى كۇشەيتۋ بويىنشا مينيسترگە ناقتى مىندەتتەر جۇكتەدى.
