شىمكەنت زووباعىندا جاڭعىرتۋ جۇمىستارى قىزۋ ءجۇرىپ جاتىر. 40 جىل قولدانىستا بولعان تەمىر تور ۆولەرلەر جىرتقىش اڭدار مەن جانۋارلارعا ارنالعان زاماناۋي الاڭقايلارعا الماستىرىلۋدا. بۇدان بولەك، بيىل 15 جىل قاراۋسىز، سۋى شوگىپ قالعان كول قالپىنا كەلتىرىلىپ، اۋماعى اباتتاندىرىلعان.
شىمكەنت زووباعى تۇرعىلىقتى حالىقتىڭ جانە قالا قوناقتارىنىڭ سۇيىكتى ورىندارىنىڭ ءبىرى. وتكەن عاسىردىڭ 80 جىلدارى پايدالانۋعا بەرىلگەن زووباقتا بۇگىندە 2 جارىم مىڭنان استام جانۋار، اڭ مەن قۇستىڭ جالپى 289 ءتۇرى مەكەندەيدى.
حايۋاناتتار باعىندا زامان تالابىنا ساي بىلتىردان بەرى جاڭعىرتۋ جۇمىستارى جۇرگىزىلۋدە. تەمىر تور ۆولەرلەردىڭ ورنىنا جىرتقىش اڭدار مەن جانۋارلارعا بەيىمدەلگەن الاڭقايلار سالىنعان.
«ازىرگە جىرتقىش اڭداردى شىنى جيىنتىعىنان كورە الاسىزدار. جاڭا مەكەنگە قاسقىرلار مەن ايۋلار اۋىستىرىلدى. بولاشاقتا بارلىق تەمىر تور ۆولەرلەرى الىنىپ تاستالادى. ورنىنا وسىنداي زاماناۋي مەكەندەر پايدا بولادى. جۇمىسىمىزداعى ماسەلە – اڭدار ىشەك بۇزىلۋىمەن ءجيى اۋىرادى. مۇمكىندىكتى پايدالانىپ كەلۋشىلەرگە ايتارىم اڭداردىڭ جەمى جەتكىلىكتى، سوندىقتان ولارعا ءتۇرلى تاعامدار لاقتىرماڭىزدار»، دەيدى شىمكەنت زووباعىنىڭ ۆەتەرينارى نۇرسۇلتان تۇرار.
«زووباقتى جاڭعىرتۋ جوباسىنا سايكەس، قاراۋسىز قالعان اۋماقتار قالپىنا كەلتىرىلۋدە. 15 جىل قاڭىراپ، سۋى تارتىلىپ قالعان مىنا كول اۋماعىندا جاڭعىرتۋ جۇمىستارى قولعا الىنىپ، قولدانىسقا بەرىلدى. سۋعا تولىپ، جاعداي جاسالعاندىقتان قۇستاردىڭ قاتارى تولىعۋدا»، دەيدى شىمكەنت زووباعىنىڭ عىلىمي-ادىستەمەلىك ءبولىمىنىڭ مەڭگەرۋشىسى ۇلبولسىن يريساەۆا.
زووباقتىڭ تىنىس-تىرشىلىگىن قامتاماسىز ەتۋ ماقساتىندا قالا بيۋدجەتىنەن جىلىنا 246 ملن. تەڭگە بولىنسە، قوسىمشا 97 ملن. زووباقتىڭ ءوز تابىسىنان جۇمسالادى. 30 گەكتاردى قۇرايتىن دەمالىس ايماعىنىڭ تازالىعىن 6 جۇمىسشى قامتيدى ەكەن.
«ادامدار گازوندى باسىپ وتە سالادى. مادەنيەت جوق. تاعى قوقىستاردى ءار جەرگە تاستاپ كەتەدى. بالالارعا اتا-انالارى ەسكەرتۋ جاسامايدى. «بالام مىنا اپا سىپىرىپ كەتتى عوي، اناۋ جەرگە اپار» دەسە تىڭدايدى عوي»، دەيدى شىمكەنت زووباعىنىڭ جۇمىسشىسى جانار ءابدىجاپپاروۆا.
شاھارداعى ەپيدجاعدايعا بايلانىستى زووباق دەمالىس كۇندەرى جۇمىس ىستەمەيدى. ال جۇمىس كۇندەرى ساعات تاڭعى 9-دان تۇرعىنداردىڭ سۇراۋى بويىنشا كەشكى 20:00 گە دەيىن قىزمەت كورسەتەدى.
بيلەتتىڭ قۇنى ەرەسەكتەر ءۇشىن – 600 تەڭگە. 6 مەن 17 جاس ارالىعىنداعى بالالار ءۇشىن – 300 تەڭگە. 6 جاسقا دەيىنگى جانە 1, 2 توپتاعى مۇگەدەكتەر ءۇشىن كىرۋ تەگىن.
