Shymkent zoobaǵynda jańǵyrtý jumystary qyzý júrip jatyr. 40 jyl qoldanysta bolǵan temir tor volerler jyrtqysh ańdar men janýarlarǵa arnalǵan zamanaýı alańqaılarǵa almastyrylýda. Budan bólek, bıyl 15 jyl qaraýsyz, sýy shógip qalǵan kól qalpyna keltirilip, aýmaǵy abattandyrylǵan.
Shymkent zoobaǵy turǵylyqty halyqtyń jáne qala qonaqtarynyń súıikti oryndarynyń biri. Ótken ǵasyrdyń 80 jyldary paıdalanýǵa berilgen zoobaqta búginde 2 jarym myńnan astam janýar, ań men qustyń jalpy 289 túri mekendeıdi.
Haıýanattar baǵynda zaman talabyna saı byltyrdan beri jańǵyrtý jumystary júrgizilýde. Temir tor volerlerdiń ornyna jyrtqysh ańdar men janýarlarǵa beıimdelgen alańqaılar salynǵan.
«Ázirge jyrtqysh ańdardy shyny jıyntyǵynan kóre alasyzdar. Jańa mekenge qasqyrlar men aıýlar aýystyryldy. Bolashaqta barlyq temir tor volerleri alynyp tastalady. Ornyna osyndaı zamanaýı mekender paıda bolady. Jumysymyzdaǵy másele – ańdar ishek buzylýymen jıi aýyrady. Múmkindikti paıdalanyp kelýshilerge aıtarym ańdardyń jemi jetkilikti, sondyqtan olarǵa túrli taǵamdar laqtyrmańyzdar», deıdi Shymkent zoobaǵynyń veterınary Nursultan Turar.
«Zoobaqty jańǵyrtý jobasyna sáıkes, qaraýsyz qalǵan aýmaqtar qalpyna keltirilýde. 15 jyl qańyrap, sýy tartylyp qalǵan myna kól aýmaǵynda jańǵyrtý jumystary qolǵa alynyp, qoldanysqa berildi. Sýǵa tolyp, jaǵdaı jasalǵandyqtan qustardyń qatary tolyǵýda», deıdi Shymkent zoobaǵynyń ǵylymı-ádistemelik bóliminiń meńgerýshisi Ulbolsyn Irısaeva.
Zoobaqtyń tynys-tirshiligin qamtamasyz etý maqsatynda qala bıýdjetinen jylyna 246 mln. teńge bólinse, qosymsha 97 mln. zoobaqtyń óz tabysynan jumsalady. 30 gektardy quraıtyn demalys aımaǵynyń tazalyǵyn 6 jumysshy qamtıdy eken.
«Adamdar gazondy basyp óte salady. Mádenıet joq. Taǵy qoqystardy ár jerge tastap ketedi. Balalarǵa ata-analary eskertý jasamaıdy. «Balam myna apa sypyryp ketti ǵoı, anaý jerge apar» dese tyńdaıdy ǵoı», deıdi Shymkent zoobaǵynyń jumysshysy Janar Ábdijapparova.
Shahardaǵy epıdjaǵdaıǵa baılanysty zoobaq demalys kúnderi jumys istemeıdi. Al jumys kúnderi saǵat tańǵy 9-dan turǵyndardyń suraýy boıynsha keshki 20:00 ge deıin qyzmet kórsetedi.
Bılettiń quny eresekter úshin – 600 teńge. 6 men 17 jas aralyǵyndaǵy balalar úshin – 300 teńge. 6 jasqa deıingi jáne 1, 2 toptaǵy múgedekter úshin kirý tegin.
