وقۋ-اعارتۋ مينيسترلىگى پەداگوگتاردى اتتەستاتتاۋ قاعيدالارىن قايتا قاراپ، مينيسترلىكتە بۇعان دەيىن بەكىگەن بۇيرىقتاردى قايتا زەردەلەيتىن بولدى، دەپ حابارلايدى «ادىرنا» ءتىلشىسى.
مينيسترلىك مالىمەتىنشە، سالاداعى قۇقىقتىق اكتىلەرگە تالداۋ جۇرگىزەتىن جۇمىس توبى قۇرىلعان. ونىڭ قۇرامىنا ەلىمىزدىڭ ءار وڭىرىنەن بەلسەندى پەداگوگتەر كىرگەن.
«جۇمىس توبىن قۇرۋداعى باستى ماقسات - پەداگوگتىك قاۋىمداستىقپەن كەرى بايلانىستى كۇشەيتۋ، ۇسىنىستاردى اشىق جانە جاريالى تۇردە تالقىلاۋ. جۇمىس توبى جۇرگىزگەن تالداۋ ناتيجەلەرى بويىنشا مينيسترلىك ناقتى ۇسىنىستار پاكەتىن ازىرلەيدى. ءبىز ون نەگىزگى باعىت بويىنشا جۇمىس جاساپ، بارلىق نورماتيۆتىك قۇقىقتىق اكتىلەرگە تالداۋ جاسايمىز. تالداۋ قورىتىندىلارى بويىنشا ۇسىنىستارىڭىز الداعى جىلدىڭ اقپان ايىندا ءاربىر باعىت بويىنشا بولەك تالقىلاناتىن بولادى»،- دەدى وقۋ-اعارتۋ ءمينيسترى جۇلدىز سۇلەيمەنوۆا.
جيىندا جۇمىس توبىنداعى بەلسەندىلەر پەداگوگتاردى اتتەستاتتاۋدان وتكىزۋ قاعيدالارىن دا قايتا قاراۋ ماسەلەسىن كوتەردى. بۇعان دەيىن مينيسترلىككە كەلىپ تۇسكەن ۇسىنىستاردىڭ دەنى اتتەستاتتاۋدان ءوتۋ كەزىندە پەداگوگتاردان اۆتورلىق باعدارلامالاردى ازىرلەۋ تۋرالى تالاپتى الىپ تاستاۋ جونىندە بولاتىن.
«بۇگىندە «پەداگوگ-شەبەر» بىلىكتىلىك ساناتىنا قويىلاتىن تالاپتاردىڭ ءبىرى- رەسپۋبليكالىق وقۋ-ادىستەمەلىك كەڭەس ۇسىنعان اۆتورلىق باعدارلامالاردى ازىرلەۋ جانە تاجىريبەگە ەنگىزۋ. ى. التىنسارين اتىنداعى ۇلتتىق ءبىلىم اكادەمياسى جانىنداعى ساراپتامالىق كەڭەس مەكتەپكە دەيىنگى جانە ورتا ءبىلىم بەرۋ سالاسىنداعى پەداگوگتەردىڭ اۆتورلىق باعدارلامالارىنا رەسپۋبليكالىق دەڭگەيدە ساراپتاما جۇرگىزەدى»،-دەلىنگەن حابارلامادا.
2025 جىلى رەسپۋبليكالىق ساراپتامالىق كەڭەس 875 ماتەريالدى قاراستىرعان. ونىڭ ىشىندە 303 اۆتورلىق باعدارلاما ماقۇلدانىپ، 572 اۆتورلىق باعدارلاما قايتا پىسىقتاۋعا جىبەرىلدى. ۇسىنىلعان اۆتورلىق باعدارلامالاردى تالداۋ ناتيجەلەرى ءاربىر ەكىنشى جۇمىستى تولىقتىرۋ كەرەكتىگىن كورسەتىپ وتىر.
سالا ءمينيسترى اۆتورلىق باعدارلامالاردىڭ كوبى مازمۇندىق جانە تەحنيكالىق تالاپتارعا سايكەس كەلمەيتىنىن جانە مۇنداي قۇجاتتىڭ تالاپ ەتىلۋى پەداگوگتەردىڭ ۋاقىتىن ءتيىمسىز جۇمساۋعا جانە ءفورماليزمنىڭ كۇشەيۋىنە الىپ كەلگەنىن العا تارتتى. ماقۇلدانعان اۆتورلىق باعدارلامالاردىڭ ءتىزىمى ى. التىنسارين اتىنداعى ۇلتتىق ءبىلىم اكادەمياسىنىڭ رەسمي سايتىندا جاريالانعانىمەن، باعدارلامالار ءبىلىم بەرۋ ۇيىمدارىندا كەڭىنەن قولدانىلمايدى.
«اتتەستاتسيا كەزىندە پەداگوگتارعا قويىلاتىن تالاپتار پەداگوگ قىزمەتىنىڭ ناقتى ناتيجەسىنە باعىتتالىپ، فورمالدى قۇجات اينالىمىن ازايتۋدى، پەداگوگتەردىڭ شىعارماشىلىق الەۋەتىن ءتيىمدى پايدالانۋعا جانە كاسىبي شەبەرلىكتى باعالاۋدىڭ ساپاسىن ارتتىرۋعا مۇمكىندىك بەرۋى ءتيىس. وسى ورايدا سىزدەردىڭ تاراپتارىڭىزدان ناقتى ۇسىنىستار كۇتەمىز»،- دەدى جۇلدىز سۇلەيمەنوۆا جۇمىس توبىنىڭ مۇشەلەرىنە.
الداعى ۋاقىتتا «پەداگوگ-شەبەر» بىلىكتىلىك ساناتىنا قويىلاتىن تالاپتار قاتارىنان اۆتورلىق باعدارلامالاردى ازىرلەۋدى الىپ تاستاپ، ونىڭ ورنىنا پەداگوگتىڭ كاسىبي قۇزىرەتتىلىگىن ناقتى ءارى ءادىل باعالاۋعا مۇمكىندىك بەرەتىن، وقۋ-تاربيە پروتسەسىنىڭ ساپاسىن ارتتىرۋعا ىقپال ەتەتىن بالامالى ينسترۋمەنتتەر ەنگىزىلەتىن بولادى.
