اباي وبلىسى بەستەرەك اۋىلىندا ءتورت بالانىڭ ولىمىنە اكەلىپ سوقتىرعان رەزونانستى ءىس بويىنشا سوت ۇكىمى شىقتى، دەپ حابارلايدى «ادىرنا» ءتىلشىسى.
55 جاستاعى جۇرگىزۋشى جول قوزعالىسى ەرەجەلەرىن بۇزىپ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققانى ءۇشىن كىنالى دەپ تانىلدى. سوت وعان 9 جىلعا باس بوستاندىعىنان ايىرۋ جازاسىن تاعايىندادى. جەڭىلدەتەتىن ءمان-جايلار رەتىندە ونىڭ كامەلەتكە تولماعان بالاسىنىڭ بار ەكەنى جانە كىناسىن تولىق مويىنداۋى ەسكەرىلگەن.
بۇعان دەيىن ايىپتاۋشى تاراپ سوتتالۋشىعا 9 جىل 6 اي جازا سۇراعان ەدى. سوڭعى سوزىندە ەر ادام ءوز كىناسىن مويىنداپ، قازا تاپقان جانە زارداپ شەككەن بالالاردىڭ تۋىستارىنان كەشىرىم سۇرادى.
ەسكە سالايىق، قايعىلى وقيعا 19 تامىزدا بولعان ەدى. Toyota كولىگىن باسقارعان 55 جاستاعى جۇرگىزۋشى اۋلا ىشىندە ويناپ وتىرعان بالالاردى قاعىپ، سالدارىنان ءتورت بالا قازا تاۋىپ، ەكەۋى ءتۇرلى جاراقات العان. سوتتا جۇرگىزۋشى كولىك تىزگىنىندە تالماسى ۇستاپ قالعانىن ايتقان. سول سەبەپتى اۋلادا ويناپ جۇرگەن التى بالانى قاققانىن بىلمەگەن. ەسىن تەك پوليتسيا بولىمشەسىندە جيعان.
