28 جەلتوقسان كۇنى ماڭعىستاۋ وبلىسىنىڭ جاڭاوزەن قالاسىندا «وزەنمۇنايگاز» كومپانياسىنىڭ بەلسەندىسى، بۇرىن ءماجىلىس دەپۋتاتتىعىنا كانديدات بولعان مۇراتباي جۇماعاليەۆ سوققىعا جىعىلدى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ مالىمەتىنشە، 28 جەلتوقسان كۇنى تاڭعى ساعات 04:10-دا جاڭاوزەن قالالىق اۋرۋحاناسىنا م.جۇماعاليەۆ جەتكىزىلگەن. اۋرۋحاناعا تۇسكەن كەزدە ونىڭ جاعدايى وتە اۋىر ەدى.
الدىن الا قويىلعان دياگنوزى: جابىق باس-مي جاراقاتى، ميدىڭ شايقالۋى، ماڭداي تۇسى مەن بەت ايماعىندا ەكى جاقتى كوپتەگەن سىرىلۋ جاراقاتتارى بار. جاعدايىنىڭ اۋىرلىعىنا بايلانىستى ناۋقاس جانساقتاۋ بولىمىنە جاتقىزىلدى، دەپ حابارلادى ماڭعىستاۋ وبلىستىق دەنساۋلىق ساقتاۋ باسقارماسى.
كەيىن ناۋقاس تراۆماتولوگيا جانە نەيروحيرۋرگيا بولىمىنە اۋىستىرىلعان. قازىرگى ۋاقىتتا ونىڭ ومىرىنە قاۋىپ ءتونىپ تۇرعان جوق.
وقيعا بويىنشا پوليتسيا قىلمىستىق ءىس قوزعادى. م.جۇماعاليەۆتى ءوزىنىڭ تۋىسى سوققىعا جىققانى انىقتالدى.
— وقيعا تۇنگى ۋاقىتتا جاڭاوزەن قالاسىنداعى جەكە تۇرعىن ۇيلەردىڭ بىرىندە ەر ادام مەن ونىڭ تۋىسى (جيەنى) بىرگە سپيرتتىك ىشىمدىك ءىشىپ وتىرعان كەزدە بولعان. ولاردىڭ اراسىندا تۇرمىستىق جانجال شىعىپ، ارتى توبەلەسكە ۇلاستى. ناتيجەسىندە ەر ادام دەنە جاراقاتىن الىپ، اۋرۋحاناعا جەتكىزىلدى، — دەپ مالىمدەدى ماڭعىستاۋ وبلىستىق پوليتسيا دەپارتامەنتى.
پوليتسيا وكىلدەرى الكوگولدى شامادان تىس تۇتىنۋ، اگرەسسيا كورسەتۋ، سونداي-اق جەكە جانە وتباسىلىق-تۇرمىستىق جانجالداردى كۇش قولدانۋ ارقىلى شەشۋگە ۇمتىلۋ قوعامعا قاۋىپتى ارەكەت ەكەنىن اتاپ ءوتتى. ولار مۇنداي قۇقىق بۇزۋشىلىقتار ءۇشىن تۋىستىق دەڭگەيىنە نەمەسە تاراپتاردىڭ جەكە قارىم-قاتىناسىنا قاراماستان، زاڭ الدىندا جاۋاپكەرشىلىك كوزدەلەتىنىن جانە كىنالى تۇلعالار قىلمىستىق جاۋاپقا تارتىلاتىنىن ەسكەرتتى.
مۇراتباي جۇماعاليەۆ جاڭاوزەن مۇنايشىلارىنىڭ نارازىلىق اكتسيالارىن بىرنەشە رەت ۇيىمداستىرعان ازامات رەتىندە بەلگىلى. 2023 جىلى ول ءبىر مانداتتىق وكرۋگ بويىنشا ءماجىلىس دەپۋتاتتىعىنا كانديدات بولىپ قاتىستى. بىراق ەدىل جاڭبىرشيننەن ۇتىلىپ قالعان بولاتىن.
