بۇل جايىندا تۇركىستان وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى پوليتسيا پولكوۆنيگى ابدۋعاني سەيدۋاليەۆ قر ءىىم-ءنىڭ تاپسىرماسىنا سايكەس وتكىزىلگەن بريفينگتە ايتىپ ءوتتى.
اتالعان شارا تۇركىستان وبلىسى پوليتسيا دەپارتامەنتىنىڭ «ينستاگرام» جانە «فەيسبۋك» رەسمي پاراقشاسىندا وتكىزىلدى. بريفينگتىڭ تاقىرىبى «بالالاردىڭ جولداعى قاۋىپسىزدىگى» تۋرالى بولعاندىقتان، سۇحبات تۇركىستان وبلىسى بويىنشا كامەلەت جاسىنا تولماعانداردىڭ قاتىسۋىمەن بولاتىن جول-كولىك وقيعالارىنىڭ الدىن الۋ، بولدىرماۋعا، بالا قاۋىپسىزدىگى بويىنشا اتا-انانىڭ ءرولى مەن مىندەتىنە، ونداعى ەسكەرەر ماڭىزدى جايتتارعا ارنالدى.
پوليتسيا پولكوۆنيگى ا. سەيدۋاليەۆ ءوز سوزىندە: «وقۋ جىلىنىڭ باستالۋىنا از ۋاقىت قالدى، وسىعان بايلانىستى تامىز ايىنىڭ 1-ءى مەن 10-ى كۇندەرى ارالىعىندا اكىمشىلىك پوليتسيا باسقارماسىنىڭ جول-تەحنيكالىق ينسپەكتسياسىنىڭ قىزمەتكەرلەرىمەن جول بويىنا جاقىن ورنالاسقان مەكتەپتەرگە زەردەلەۋ جۇمىستارى جۇرگىزىلدى. تەكسەرۋ بارىسىندا انىقتالعان كەمشىلىكتەر بويىنشا ءتيىستى مەكەمەلەرگە كەمشىلىكتەردى جويۋ بويىنشا 726 ۇسىنىس ەنگىزىلدى، جاڭادان 79 ورتا ءبىلىم بەرۋ ورىندارى الدىنا جاساندى جول كەدەرگىلەرى ورناتىلدى. ودان بولەك بالالاردىڭ جول-كولىك جاراقاتى ماسەلەسىنە جۇرتشىلىق نازارىن اۋدارۋ ءۇشىن «ابايلاڭىز، جاياۋ جۇرگىنشى»، «قاۋىپسىز جول»، «اۆتوبۋس» سەكىلدى ءتۇرلى جەدەل-پروفيلاكتيكالىق ءىس-شارالار جۇيەلى تۇردە وتكىزىلۋدە.
وسى تۇستا وبلىستاعى بارلىق اتا-انالارعا بالالارىڭىزدى جولدا قاراۋسىز قالدىرماڭىزدار، ولاردى بارىنشا قاداعالاپ، ۇلگى بولىڭىزدار دەگىم كەلەدى. ياعني وزىڭىزدەن باستاپ، جول قوزعالىسى ەرەجەسىن ساقتاۋدى داعدىعا اينالدىرىڭىزدار. بالا كورگەنىن ىستەيتىنىن ەستەن شىعارمايىق. ەلىمىزدىڭ بولاشاعى – بالالار دەسەك، سول جەتكىنشەك ۇرپاقتىڭ جولداعى قاۋىپسىزدىگىنە نەمقۇرايلى قارامايىق!»،-دەپ اتاپ ءوتتى.
وسىلايشا بريفينگ بارىسىندا وبلىس كولەمىندە اتقارىلىپ جاتقان تىندىرىمدى تىرلىكتەر ايتىلدى. ءوز كەزەگىندە جەلى قولدانۋشىلارى دا جازباشا تۇردە ساۋالدارىن جولداپ، كوكەيتەستى سۇراقتارىنا جاۋاپ الدى.
پوليتسيا مەن حالىق اراسىنداعى كەرى بايلانىستى نىعايتىپ، اشىقتىقتى قامتاماسىز ەتۋ ماقساتىندا وتكىزىلگەن بۇل بريفينگ اپتا سايىن جالعاسىن تاباتىن بولادى.
