بۇل تۋرالى بۇگىن قالا اكىمى مۇرات ايتەنوۆكە «تسيفلىق قازاقستان» مەملەكەتتىك باعادارلاماسى اياسىندا اتقارىلىپ جاتقان جۇمىستار جايىن بايانداعان تسيفرلاندىرۋ باسقارماسىنىڭ باسشىسى ءا.ءابدىراحانوۆ ءمالىم ەتتى.
ونىڭ ايتۋىنشا، «Digital Elements» جشس تاراپىنان قالا اۋماعىنداعى نۇرتاس، تاسساي، تاسكەن، پاحتاكور شاعىن اۋداندارىنداعى 4 كوشەگە، ياعني 400 ۇيگە كابەل جۇرگىزىلىپ، بۇگىندە ينتەرنەتكە قوسىلعان. ال، «I-LinkNet» جشس تاراپىنان اقجايىق شاعىن اۋدانىنا تالشىقتى وپتيكا جەلىسى تولىق جۇرگىزىلىپ، 4000-عا جۋىق ۇيگە تالشىقتى وپتيكا جەلىسى تارتىلعان. ونىڭ ىشىندە 250 دەن استام ءۇي ءوتىنىش بەرۋ ارقىلى جوعارعى جىلدامدىقتى ساپالى ينتەرنەتكە قوسىلىپتى.
«بۇگىنگى تاڭدا، دوستىق شاعىن اۋدانىنا كابەل جۇرگىزۋ جۇمىستارى جۇرگىزىلۋدە، الداعى كۇندەرى ىسكە قوسىلىپ، شاعىن اۋدان تولىققاندى تالشىق-وپتيكالىق ينتەرنەتپەن قامتىلاتىن بولادى. سونىمەن قاتار، جەكە ينۆەستور ەسەبىنەن 2021-2023 جىلدارى شالعاي ورنالاسقان ەلدى مەكەندەردى ساپالى ينتەرنەتپەن قامتۋعا 1 ملرد. تەڭگە قارجى قاراستىرىلدى. ناتيجەسىندە 80 000 ءۇي ساپالى ينتەرنەت جەلىسىمەن قامتىلاتىن بولادى»،-دەدى باسقارما باسشىسى.
2020-جىلدان باستاپ شىمكەنت قالاسىن ساپالى ينتەرنەتپەن قامتاماسىز ەتۋ ماقساتىندا اۋقىمدى جۇمىستار اتقارىلىپ، جۇمىستار ءۇش كەزەڭگە ءبولىندى. العاشقى كەزەڭ بويىنشا بۇگىنگى كۇنگە قالاداعى شاعىن اۋداندار مەن تۇرعىن الاپتار اۋماعىنا 11 بازالىق ستانتسيا ورناتىلدى.
2021 جىلى قالا اۋماعىن ساپالى ينتەرنەتپەن قامتاماسىز ەتۋدىڭ 2-كەزەڭىندە 14 جەردىڭ كوورديناتاتالارى ءموبيلدى بايلانىس وپەراتورلارىمەن كەلىسىلدى. ونىڭ 8 نۇكتەسى جەكە ينۆەستور ەسەبىنەن، 6 نۇكتەسى اكىمدىكپەن ءموبيلدى بايلانىس وپەراتورلورىمەن بىرلەسە جەكە نىسان يەلەرىمەن تىكەلەي كەلىسۋى ارقىلى ىسكە اسىرىلادى. سەگىز جەر تەلىمىنىڭ ەكەۋىنە (تاسساي مەن ىنتىماق شاعىن اۋداندارى) انتەننا-ماتچتالىق قۇرىلعى ورناتىلىپ، ەلەكتر ەنەرگياسىنا جالعاۋ جۇمىستارى باستالدى. قالعان 6 نۇكتە بويىنشا ينۆەستور تاراپى جەر قازۋ جۇمىستارىن جۇرگىزۋدە.
جەكە نىسان يەلەرىمەن كەلىسۋ كوزدەلگەن 6 نۇكتەنىڭ 2-نە (ابدۋلاباد، زابادام) بازالىق ستانتسيالار ورناتىلىپ، ەلەكتر ەنەرگياسىن تارتۋ جۇمىستارى باستالدى. قالعان 4 جەر تەلىمى بويىنشا كوممەرتسيالىق نىسان يەلەرىمەن كەلىسىلىپ، مونتاجداۋ جۇمىستارى باستالدى.
