شىمكەنت قالاسىندا «ەڭبەك» مەملەكەتتىك باعدارلاماسى اياسىندا جاستاردى جۇمىسپەن قامتۋ ءىس-شارالارى بەلسەندى جۇرگىزىلۋدە. مەملەكەتتىك باعدارلاما شەڭبەرىندە ەڭبەك تاجىريبەسى جوق جاستاردى قولداۋ ماقساتىندا «العاشقى جۇمىس ورنى» جوباسى جۇزەگە اسىرىلىپ جاتىر.
باعدارلاماعا قاتىسۋشىلاردىڭ ءبىرى – مەرەي اتىمتاي. ول بيىل «شىمكەنت جوعارى مەديتسينالىق» كوللەدجىن «دانتيست-ستوماتولوگ» ماماندىعى بويىنشا تامامداعان بولاتىن.
– وقۋ ورنىن بىتىرگەن سوڭ بىردەن جۇمىس تابىلا قويمادى. بارلىق جەردە جۇمىس تاجىريبەسىن تالاپ ەتەدى. بىراق مەندە ولارعا قاجەت تاجىريبە بولعان جوق. ديپلومدى ەندى العان كەزىم عوي. كەيىنەن جاستارعا ارنالعان جاڭا جوبا بار ەكەنىن ەستىپ، قالالىق جۇمىسپەن قامتۋ ورتالىعىنا بارىپ، كەڭەس الدىم. وندا ماعان باعدارلامانىڭ شارتتارى مەن تيىمدىلىگىن ءتۇسىندىرىپ، ءوز ماماندىعىم بويىنشا قالاداعى «ۋلىبكا» ستوماتولوگياسىنا جولدادى، – دەيدى 19 جاسار قالا تۇرعىنى.
جالپى اتالعان جوباعا 29 جاسقا دەيىنگى مۇلدەم جۇمىس ءوتىلىمى جوق جۇمىسسىز جاستار، ونىڭ ىشىندە NEET ساناتىنداعى جاستار قاتىسا الادى. سونىمەن قاتار، العاشقى جۇمىس ورنىنا ورنالاسۋعا كوپ بالالى نەمەسە از قامتىلعان وتباسى مۇشەلەرىنە، ەڭبەككە قابىلەتتى مۇگەدەكتەر مەن تەحنيكالىق جانە كاسىپتىك ماماندىق يەلەرىنە باسىمدىق بەرىلەدى.
جۇمىسپەن قامتۋ ورتالىعى جۇمىس بەرۋشىلەرمەن كەلىسىمشارت جاساپ، وقۋ ورنىن اياقتاعان جاستاردى 24 اي جۇمىسپەن قامتيدى. جوباعا قاتىسۋشىنىڭ ەڭبەكاقىسى – 20 اەك. حالىقتى جۇمىسپەن قامتۋ ورتالىعى جۇمىستىڭ العاشقى 12 ايدىڭ ەڭبەكاقىسىن سۋبسيديالايدى.
ۇمىتكەرلەر تىركەلگەن مەكەنجايى بويىنشا جۇمىسپەن قامتۋ ورتالىعى بولىمشەلەرىنە جەكە كۋالىگى مەن ءبىلىمى تۋرالى قۇجات كوشىرمەسىن تاپسىرىپ، ءوتىنىم بەرە الادى.
ايتا كەتسەك، بۇگىنگى تاڭدا جوباعا قاتىسۋعا 50-گە جۋىق جاس جولدانىپ، ونىڭ 45-ءى قالاداعى ءتۇرلى مەكەمەلەر مەن كاسىپورىندارعا جۇمىسقا كىرىستى.
