Shymkent qalasynda «Eńbek» memlekettik baǵdarlamasy aıasynda jastardy jumyspen qamtý is-sharalary belsendi júrgizilýde. Memlekettik baǵdarlama sheńberinde eńbek tájirıbesi joq jastardy qoldaý maqsatynda «Alǵashqy jumys orny» jobasy júzege asyrylyp jatyr.
Baǵdarlamaǵa qatysýshylardyń biri – Mereı Atymtaı. Ol bıyl «Shymkent joǵary medıınalyq» kolledjin «Dantıst-stomatolog» mamandyǵy boıynsha támamdaǵan bolatyn.
– Oqý ornyn bitirgen soń birden jumys tabyla qoımady. Barlyq jerde jumys tájirıbesin talap etedi. Biraq mende olarǵa qajet tájirıbe bolǵan joq. Dıplomdy endi alǵan kezim ǵoı. Keıinen jastarǵa arnalǵan jańa joba bar ekenin estip, qalalyq jumyspen qamtý ortalyǵyna baryp, keńes aldym. Onda maǵan baǵdarlamanyń sharttary men tıimdiligin túsindirip, óz mamandyǵym boıynsha qaladaǵy «Ýlybka» stomatologııasyna joldady, – deıdi 19 jasar qala turǵyny.
Jalpy atalǵan jobaǵa 29 jasqa deıingi múldem jumys ótilimi joq jumyssyz jastar, onyń ishinde NEET sanatyndaǵy jastar qatysa alady. Sonymen qatar, alǵashqy jumys ornyna ornalasýǵa kóp balaly nemese az qamtylǵan otbasy múshelerine, eńbekke qabiletti múgedekter men tehnıkalyq jáne kásiptik mamandyq ıelerine basymdyq beriledi.
Jumyspen qamtý ortalyǵy jumys berýshilermen kelisimshart jasap, oqý ornyn aıaqtaǵan jastardy 24 aı jumyspen qamtıdy. Jobaǵa qatysýshynyń eńbekaqysy – 20 AEK. Halyqty jumyspen qamtý ortalyǵy jumystyń alǵashqy 12 aıdyń eńbekaqysyn sýbsıdııalaıdy.
Úmitkerler tirkelgen mekenjaıy boıynsha jumyspen qamtý ortalyǵy bólimshelerine jeke kýáligi men bilimi týraly qujat kóshirmesin tapsyryp, ótinim bere alady.
Aıta ketsek, búgingi tańda jobaǵa qatysýǵa 50-ge jýyq jas joldanyp, onyń 45-i qaladaǵy túrli mekemeler men kásiporyndarǵa jumysqa kiristi.
