شىمكەنتتە بۇگىن 200-گە جۋىق ەرىكتى «جاسىل ەل» جانە «ستۋدەنتتىك قۇرىلىس جاساقتارى» باعدارلاماسى بويىنشا تازالىق جۇمىستارىنا اتسالىستى. اتالمىش جوبا اباي اۋدانى اكىمىنىڭ اپپاراتى مەن «جاستار رەسۋرستىق ورتالىعى» مەكەمەسىنىڭ باستاسىمەن قولعا الىندى.
شارا 8 شاعىناۋدانىندا ورنالاسقان وتباسىلىق اللەيا اۋماعىندا وتكىزىلدى. باستى ماقسات – جاستاردىڭ ەكولوگيالىق ءبىلىمىن ارتتىرۋ جانە قورشاعان ورتانىڭ لاستانۋىنا جول بەرمەۋ.
شىمكەنتتە 200-گە جۋىق ەرىكتى تازالىق جۇمىستارىن جۇرگىزدى. ماقسات – اينالانى قوقىستان تازارتىپ، جاستاردى سالاۋاتتى ءومىر سالتى مەن ەڭبەككە باۋلۋ. اباي اۋدانىنىڭ اكىمى دە وسى ءىس-شارانىڭ باسى-قاسىندا ءجۇردى. ونىڭ سوزىنشە، تۇرعىندار ءوز اۋلاسىنىڭ تازالىعىنا ءوزى جاۋاپتى بولۋى كەرەك. اكىمشىلىككە بار مىندەتتى جۇكتەپ قويماي، قالانىڭ كوركەيۋىنە جۇرتشىلىق تا اتسالىسۋ قاجەت دەپ سانايدى.
بۇحارباي پارمانوۆ، اباي اۋدانىنىڭ اكىمى: «ءبىز بارىنشا مەكەمەلەرمەن تازالىق جۇمىستارىن جۇرگىزىپ جاتىرمىز. بىراق ءبىزدىڭ تۇرعىندارىمىز دا بۇعان اتسالىسۋى كەرەك. تەك قانا اكىمشىلىك ازاماتتارى كەلەدى، سولاردىڭ مىندەتى، سولار تازالاۋ كەرەك دەسەك، كوپ قاتەلەسەمىز. كورىپ جاتقان جاستارىمىز دا سوعان ۇيرەنەدى. ءبىز بارىنشا ءوزىمىزدىڭ اۋلامىزدى ءوزىمىز تازالايتىن بولساق، وتىرعان جەرىمىزدى ءوزىمىز رەتكە كەلتىرسەك، ول ۇلكەن دۇنيە».
ۇيىمداستىرۋشىلاردىڭ سوزىنشە، مۇنداي سەنبىلىك قالادا اپتاسىنا 3 رەت وتكىزىلىپ تۇرادى. كوپتەگەن ەرىكتى اتالمىش شاراعا العاش رەت قاتىسىپ تۇر ەكەن. ولار قالانى تازارتۋعا ۇلەس قوسىپ قانا قويماي، وزدەرىنە جاڭا دوس تاۋىپ جاتقانىن ايتادى.
ارۋجان ساعىناي، ەرىكتى: «ءبىز وسى قالا ىشىندە قوقىستاردى جيناۋمەن اينالىسىپ جاتىرمىز. ول ءوزىمىزدىڭ دەنساۋلىعىمىزعا دا پايدالى. وسى قالامىزدىڭ ادەمىلىگىنە قاتىسى بار. وزىمە وسى جەردەن جاقسى دوستار تاپتىم. بارلىقتارى وزىمىزبەن جاستى. بارلىعىمىز اتسالىسىپ، جيناپ جاتىرمىز».
تازالىق جۇمىستارى 2 ايعا جالعاساتىن بولادى. وعان 16-29 جاس ارالىعىنداعى بەلسەندى جاستار مەن ەرىكتىلەر جۇمىلدىرىلماق. سونىمەن قاتار، بەلسەنە قاتىسقان جاستارعا جىل قورىتىندىسى بويىنشا ارنايى سىيلىقتار تابىستاۋ جوسپارلانۋدا.
