Air Astana اۋە كومپانياسىنىڭ سەۋلدەن استاناعا باعىت العان ۇشاعى بەيجىڭ قالاسىنا ءماجبۇرلى تۇردە قوندى، دەپ حابارلايدى «ادىرنا» ءتىلشىسى.
وقيعا بۇگىن، 8 قاڭتاردا KC210 رەيسىندە تىركەلگەن. ءماجبۇرلى قونۋعا ۇشاقتاعى بارلىق دارەتحانالاردىڭ ىستەن شىعۋى سەبەپ بولعان.
«اۋە كەمەسى جەرگىلىكتى ۋاقىت بويىنشا ساعات 9:25-تە ۇشىپ شىعىپ، 11:50-دە ءساتتى قوندى. قازىرگى ۋاقىتتا اقاۋدى جويۋ ءۇشىن قاجەتتى قوسالقى بولشەك جەتكىزىلۋى كۇتىلۋدە. رەيستىڭ قايتا ۇشۋى جەرگىلىكتى ۋاقىتپەن 1:00-گە اۋىستىرىلدى»، – دەلىنگەن حابارلامادا.
قىتايدىڭ شەكارا قىزمەتىنە ۆيزاسى قاجەت ەمەس جولاۋشىلاردى قالاعا شىعارىپ، قوناقۇيلەرگە ورنالاستىرۋعا رۇقسات بەرۋ جونىندە رەسمي ءوتىنىش جولدانعان. ال قالعان جولاۋشىلار ترانزيت ايماعىندا قالادى. ولارعا تاماق، سۋسىن جانە كورپەلەر بەرىلگەن.
اۋە كومپانياسى جولاۋشىلاردان بولعان قولايسىزدىق ءۇشىن كەشىرىم سۇرادى.
ايتا كەتەيىك، وسىعان ۇقساس جاعداي 2025 جىلعى 27 جەلتوقساندا دا بولعان. ول كەزدە فۋكۋوك (ۆەتنام) – الماتى باعىتىمەن ۇشقان Air Astana ۇشاعى تەحنيكالىق اقاۋعا بايلانىستى اۋەجايعا قايتا قونعان ەدى.
