Shymkentte búgin 200-ge jýyq erikti «Jasyl el» jáne «Stýdenttik qurylys jasaqtary» baǵdarlamasy boıynsha tazalyq jumystaryna atsalysty. Atalmysh joba Abaı aýdany ákiminiń apparaty men «Jastar resýrstyq ortalyǵy» mekemesiniń bastasymen qolǵa alyndy.
Shara 8 shaǵynaýdanynda ornalasqan otbasylyq alleıa aýmaǵynda ótkizildi. Basty maqsat – jastardyń ekologııalyq bilimin arttyrý jáne qorshaǵan ortanyń lastanýyna jol bermeý.
Shymkentte 200-ge jýyq erikti tazalyq jumystaryn júrgizdi. Maqsat – aınalany qoqystan tazartyp, jastardy salaýatty ómir salty men eńbekke baýlý. Abaı aýdanynyń ákimi de osy is-sharanyń basy-qasynda júrdi. Onyń sózinshe, turǵyndar óz aýlasynyń tazalyǵyna ózi jaýapty bolýy kerek. Ákimshilikke bar mindetti júktep qoımaı, qalanyń kórkeıýine jurtshylyq ta atsalysý qajet dep sanaıdy.
Buharbaı Parmanov, Abaı aýdanynyń ákimi: «Biz barynsha mekemelermen tazalyq jumystaryn júrgizip jatyrmyz. Biraq bizdiń turǵyndarymyz da buǵan atsalysýy kerek. Tek qana ákimshilik azamattary keledi, solardyń mindeti, solar tazalaý kerek desek, kóp qatelesemiz. Kórip jatqan jastarymyz da soǵan úırenedi. Biz barynsha ózimizdiń aýlamyzdy ózimiz tazalaıtyn bolsaq, otyrǵan jerimizdi ózimiz retke keltirsek, ol úlken dúnıe».
Uıymdastyrýshylardyń sózinshe, mundaı senbilik qalada aptasyna 3 ret ótkizilip turady. Kóptegen erikti atalmysh sharaǵa alǵash ret qatysyp tur eken. Olar qalany tazartýǵa úles qosyp qana qoımaı, ózderine jańa dos taýyp jatqanyn aıtady.
Arýjan Saǵynaı, erikti: «Biz osy qala ishinde qoqystardy jınaýmen aınalysyp jatyrmyz. Ol ózimizdiń densaýlyǵymyzǵa da paıdaly. Osy qalamyzdyń ádemiligine qatysy bar. Ózime osy jerden jaqsy dostar taptym. Barlyqtary ózimizben jasty. Barlyǵymyz atsalysyp, jınap jatyrmyz».
Tazalyq jumystary 2 aıǵa jalǵasatyn bolady. Oǵan 16-29 jas aralyǵyndaǵy belsendi jastar men eriktiler jumyldyrylmaq. Sonymen qatar, belsene qatysqan jastarǵa jyl qorytyndysy boıynsha arnaıy syılyqtar tabystaý josparlanýda.
