سايرام كومەكشى مەكتەپ-ينتەرناتى «سايرام كومەكشى-مەكتەپ-ينتەرنات-كوللەدج» اتاعىنا يە بولدى

2422
Adyrna.kz Telegram

شىمكەنت قالاسىنىڭ سايرام كومەكشى مەكتەپ-ينتەرناتى «سايرام كومەكشى مەكتەپ-ينتەرنات-كوللەدجى ارنايى كەشەنى» مارتەبەسىنە يە بولدى.

مەكتەپ قابارعاسىندا 267 بالا ءبىلىم الۋدا. سايرام كومەكشى مەكتەپ-ينتەرنات-كوللەدجى ارنايى كەشەنىنە بۇرىنعى مەكتەپ-ينتەرناتتىڭ ورنىنا جاڭا ۇلگىدەگى عيمارات سالىنعان. ءبىلىم بەرۋ كەشەنى جاتاقحانا، وقۋ عيماراتى، اكت پەن سپورت زالدارى، مەديتسينالىق بەكەت جانە اسحانامەن قامتىلعان. مەكتەپ-ينتەرناتتىڭ 36 سىنىپتىق بولمەلەرى سوڭعى ۇلگىدەگى وقۋ قۇرىلعىلارىمەن جابدىقتالعان. زاماناۋي ۇلگىدە بوي كوتەرگەن عيماراتتا تىگىنشىلىك، اعاش وڭدەۋ، اسپازدىق كاسىپتى ۇيرەتۋگە ارنالعان شەبەرحانا بولمەلەرى، ارنايى كۇتىمدى قاجەت ەتەتىن بالالارعا ارنالعان كوررەكتسيالىق وقۋ، سەنسورلىق ءبىلىم الۋ، پسيحولوگ، لوگوپەد مامانداردىڭ سىنىپ بولمەلەرى ارنايى جابدىقتالىپ، جازعى سپورت الاڭى سالىنعان.

سايرام كومەكشى مەكتەپ-ينتەرناتىندا ءبىلىم مەملەكەتتىك تىلدە جۇرگىزىلەدى. سونىمەن قاتار، كاسىپتىك ماماندىقتار بويىنشا ديپلوم بەرىلەدى. قوسىمشا ءبىلىم بەرۋ ءۇشىن قولونەر جانە دەنە شىنىقتىرۋ ۇيىرمەلەرى دە جۇمىس جۇرگىزەدى.

مەكتەپ قابارعاسىندا بالالار ارنايى وقىتۋدى قاجەت ەتەتىن بالالاردىڭ پسيحوفيزيكالىق كەمشىلىگىن تۇزەتۋ، فۋنكتسيونالدىق ساۋاتتىلىعىنىن ارتتىرىپ، ەڭبەككە باۋلۋ جانە قوعامدىق ومىرگە بەيىمدەپ كەلۋدە.

شىمكەنت قالاسىنىڭ اقپاراتتىق-كوممۋنيكاتسيالىق ورتالىعى

پىكىرلەر