شىمكەنتتە قالامىزدىڭ باستى سپورتتىق جارىسىنا اينالعان «Shymkent Marathon 2021» سپورتتىق ءىس-شارا ءوتتى. سالاۋاتتى ءومىر سالتى مەن بۇقارالىق سپورتتى ناسيحاتتاۋ ماقساتىنداعى بۇل شارا ەل تاۋەلسىزدىگىنىڭ 30 جىلدىعىنا ارنالىپ وتىر.
مەگاپوليستە وسىمەن بەسىنشى جىل ۇيىمداستىرىلىپ وتىرعان جۇگىرۋ مارافونىنا شىمكەنت قالاسىنىڭ تۇرعىندارىمەن بىرگە قازاقستاننىڭ 30 قالاسىنان كەلگەن سپورتشىلار جانە اۋەسقويلار قاتىستى.
جارىسقا «Ashyq» جۇيەسىندە تىركەۋدەن وتكەن قاتىسۋشىلار جىبەرىلدى.
ستارت «ناۋرىز» الاڭىنان باستالىپ، بايدىبەك بي جانە تولەمەتوۆ كوشەسىمەن ءوتىپ، الماتى ا2 تراسساسىنا دەيىنگى باعىتتى الدى. مارە «ناۋرىز» الاڭى بولدى.
قاتىسۋشىلار 42, 21, 10 جانە 5 كم قاشىقتىقتا جۇگىرىپ ءوتتى.
مارافونعا قاتىسۋشىلاردى قالا اكىمىنىڭ ورىنباسارى م.يساحوۆ قۇتتىقتاپ، ادامنىڭ دەنى ساۋ بولۋى ءۇشىن سالاۋاتتى ءومىر سالتىن ۇستانۋ قاجەت ەكەنىن ايتتى.
جارىستىڭ جالپى جۇلدە قورى 7 ميلليون تەڭگە.
بايقاۋدىڭ بارلىق قاتىسۋشىلارىنا حالىقتار دوستىعى بەينەلەنگەن مەدالدار تابىستالدى.
