شىمكەنت قالاسىندا قر تاۋەلسىزدىگىنىڭ 30 جىلدىعىنا وراي «تاۋەلسىزدىك – بابالار اماناتى» اتتى جاس اقىندار اراسىندا رەسپۋبليكالىق «كۇمىس دومبىرا» ايتىسى مەن «كۇمىس قالام» پوەزيالىق كەشى وتەدى.
بۇگىن جاس اقىندار اراسىنداعى رەسپۋبليكالىق «كۇمىس قالام» پوەزيالىق كەشىنىڭ سالتاناتتى اشىلۋ ءراسىمى ءوتتى. شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جاس اقىندار بايگەسىنە قاتىسۋشىلارعا ساتتىلىك تىلەپ، ءىس-شارانىڭ ماڭىزدىلىعىنا توقتالىپ ءوتتى.
بايقاۋدىڭ نەگىزگى ماقساتى – تاۋەلسىزدىكتىڭ 30 جىلدىعىندا جەتكەن جەتىستىكتەردى ناسيحاتتاۋ، ادەبي ۇردىستە دارىندى جاس اقىنداردىڭ جارقىراپ كورىنۋىنە جول اشۋ. جاس تالانتتار مەن وقىرمانداردىڭ، ادەبيەتتەگى اعا بۋىن مەن جاس تولقىننىڭ ءوزارا اۋىز بىرشىلىكتە بولۋىن، ولاردىڭ ونەرگە دەگەن قىزىعۋشىلىعىن ارتتىرۋ. اتالمىش بايقاۋعا رەسپۋبليكانىڭ 14 پەن 29 جاسقا دەيىنگى 30 ايتىسكەر مەن 30 جازبا اقىنى قاتىسۋعا نيەت بىلدىرگەن. وسى رەتتە ناتيجە بويىنشا 16 ايتىسكەر جانە 20 جازبا اقىن ىرىكتەلدى. جازبا اقىندار 5 قازان كۇنى، ايتىسكەرلەر 6 قازان كۇنى وتەتىن دودادا باق سىنايدى. پوەزيالىق كەشتىڭ جەڭىمپازدارىنا، باس جۇلدە – «كۇمىس قالام» يەگەرىنە ارنايى كۇمىستەن جاسالعان قالام مەن باعالى سىيلىق تابىستالادى، ال فيناليستكە «ەسەنعالي راۋشانوۆ» اتىنداعى ارنايى سىيلىق بەرىلەدى. سونىمەن قاتار، جارتىلاي فينالعا وتكەن 4 اقىنعا «جاركەن بودەشۇلى» اتىنداعى، «ءابىلدا ايماق» اتىنداعى، «جەڭىس ءباھادۇر» اتىنداعى، «ءادىل بوتپانوۆ» اتىنداعى ارنايى سىيلىقتار تابىستالادى. ال قالعان 14 اقىن قالاماقى مەن باعالى سىيلىقتارمەن ماراپاتتالادى. ال 6 قازان كۇنى وتەتىن ايتىستىڭ ءبىرىنشى كەزەڭىندە (تۇسكە دەيىن) 16 اقىن ءبىر-بىرىمەن جۇپتاسادى. بۇل رەتتە 8 جۇپ 20-25 مينۋت كولەمىندە ايتىسادى. قازىلار القاسىنىڭ شەشىمىمەن فينالعا 8 نەمەسە 6 ايتىسكەر جولداما الادى. ال فينالدا (تۇستەن كەيىن) جالپى 4 نەمەسە 3 جۇپ 15 مينۋت كولەمىندە ايتىسىپ، جەڭىمپاز انىقتالادى. ايتىس ناتيجەسى بويىنشا 16 اقىننىڭ ىشىنەن وزا شاپقان جەڭىمپاز كۇمىستەن جاسالعان دومبىراعا جانە باعالى سىيلىققا يە بولادى.
