Shymkent qalasynda QR Táýelsizdiginiń 30 jyldyǵyna oraı «Táýelsizdik – babalar amanaty» atty jas aqyndar arasynda respýblıkalyq «Kúmis dombyra» aıtysy men «Kúmis qalam» poezııalyq keshi ótedi.
Búgin jas aqyndar arasyndaǵy respýblıkalyq «Kúmis qalam» poezııalyq keshiniń saltanatty ashylý rásimi ótti. Shymkent qalasy ákiminiń birinshi orynbasary Shyńǵys Muqan jas aqyndar báıgesine qatysýshylarǵa sáttilik tilep, is-sharanyń mańyzdylyǵyna toqtalyp ótti.
Baıqaýdyń negizgi maqsaty – Táýelsizdiktiń 30 jyldyǵynda jetken jetistikterdi nasıhattaý, ádebı úrdiste daryndy jas aqyndardyń jarqyrap kórinýine jol ashý. Jas talanttar men oqyrmandardyń, ádebıettegi aǵa býyn men jas tolqynnyń ózara aýyz birshilikte bolýyn, olardyń ónerge degen qyzyǵýshylyǵyn arttyrý. Atalmysh baıqaýǵa respýblıkanyń 14 pen 29 jasqa deıingi 30 aıtysker men 30 jazba aqyny qatysýǵa nıet bildirgen. Osy rette nátıje boıynsha 16 aıtysker jáne 20 jazba aqyn irikteldi. Jazba aqyndar 5 qazan kúni, aıtyskerler 6 qazan kúni ótetin dodada baq synaıdy. Poezııalyq keshtiń jeńimpazdaryna, bas júlde – «KÚMIS QALAM» ıegerine arnaıy kúmisten jasalǵan qalam men baǵaly syılyq tabystalady, al fınalıstke «Esenǵalı Raýshanov» atyndaǵy arnaıy syılyq beriledi. Sonymen qatar, jartylaı fınalǵa ótken 4 aqynǵa «Járken Bódeshuly» atyndaǵy, «Ábilda Aımaq» atyndaǵy, «Jeńis Bahadúr» atyndaǵy, «Ádil Botpanov» atyndaǵy arnaıy syılyqtar tabystalady. Al qalǵan 14 aqyn qalamaqy men baǵaly syılyqtarmen marapattalady. Al 6 qazan kúni ótetin aıtystyń birinshi kezeńinde (túske deıin) 16 aqyn bir-birimen juptasady. Bul rette 8 jup 20-25 mınýt kóleminde aıtysady. Qazylar alqasynyń sheshimimen fınalǵa 8 nemese 6 aıtysker joldama alady. Al fınalda (tústen keıin) jalpy 4 nemese 3 jup 15 mınýt kóleminde aıtysyp, jeńimpaz anyqtalady. Aıtys nátıjesi boıynsha 16 aqynnyń ishinen oza shapqan jeńimpaz kúmisten jasalǵan dombyraǵa jáne baǵaly syılyqqa ıe bolady.
