قر تاۋەلسىزدىگىنىڭ 30 جىلدىعىنا وراي شىمكەنت قالاسىنىڭ وپەرا جانە بالەت تەاترى ۇجىمى الەمدىك شىعارما «سەلسكايا چەست» وپەراسىن كورەرمەندەرگە تارتۋ ەتتى.
دج.ۆەرگيدىڭ نوۆەللاسىنىڭ وقيعا جەلىسىمەن جازىلعان پ.ماسكانيدىڭ الەمگە ايگىلى ەڭ ۇزدىك جانە تانىمال شىعارماسىن ساحنالاۋعا الەمگە ايگىلى جانە ەلىمىزگە تانىمال ونەر مايتالماندارى قاتىستى.
وپەرا بارىسىندا شىعارما كەيىپكەرلەرىنىڭ اراسىنداعى قارىم-قاتىناستار مەن شيەلەنىستەردى اۋەزدى مۋزىكانىڭ ىرعاعىمەن تاماشالاعان كورەرمەندەرگە وقيعانىڭ قاندى كەك الۋمەن اياقتالۋى قاتتى اسەر ەتتى. وقيعا جەلىسى بويىنشا وندا جاستاردىڭ ماحاببات ءۇشىن كۇرەسى، تالاس-تارتىسى، ساتقىندىعى، ەگەسى بار ەدى.
قويىلىمدا باستى ءرولدى حالىقارالىق بايقاۋلاردىڭ لاۋرەاتى، ماسكەۋ قالاسىنان كەلگەن ەكاتەرينا گولوۆلەۆا سومداپ شىقتى.
قويىلىم رەجيسسەرى – قىرعىزستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى نۇرلان اسانباەۆ، ديريجەرى – تەمىرجان ەرجانوۆ.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
