شىمكەنت قالاسىندا «Shymkent Shooting Plaza» اتقىشتار كەشەنىندە، گران-پري وق جانە ستەند اتۋ سپورتىنان كسرو سپورت شەبەرى ۆلاديمير پوچيۆالوۆتى ەسكە الۋعا ارنالعان حالىقارالىق تۋرنير وتۋدە.
جارىسقا بەلارۋس، قىرعىزستان، رەسەي فەدەراتسياسى، وزبەكستان جانە قازاقستاننىڭ بارلىق وڭىرلەرىنەن سپورتشىلار باق سىناسىپ جاتىر. سونداي-اق، تۋرنير بارىسىندا وليمپيادا جانە ازيا ويىندارىنىڭ، ازيا چەمپيوناتتارىنىڭ جانە الەم كۋبوكتارىنىڭ جۇلدەگەرلەرى دە ءوز شەبەرلىكتەرىن كورسەتۋدە.
قالاداعى بۇل تۋرنير وسىمەن قاتار 30-شى رەت وتكىزىلىپ وتىر. بۇل اتىس سپورتىنىڭ تاريحىندا مەرەيلى مەرەكە رەتىندە اتالىنىپ وتىر. ال 2018 جىلدان باستاپ بۇل تۋرنير ISSF حالىقارالىق سپورتتىق اتۋ فەدەراتسياسىنىڭ سپورتتىق ءىس-شارالار كۇنتىزبەسىنە ەنگىزىلدى.
جالپى حالىقارالىق دارەجەدەگى جارىستاردى وتكىزۋدەگى نەگىزگى ماقسات- ەلىمىزدەگى اتىس سپورتىن دامىتۋ، سپورتشىلاردىڭ بىلىكتىلىگىن ارتتىرۋ جانە ولاردىڭ رەيتينگىن انىقتاۋ، ولاردى رەسپۋبليكالىق جانە حالىقارالىق جارىستارعا دايىنداۋ، جاتتىقتىرۋشىلار مەن تورەشىلەردىڭ كاسىبي بىلىكتىلىگىن ارتتىرۋ.
تۋرنير وتەتىن سپورت نىساندارىندا بارلىق سانيتارلىق نورمالار ساقتالعان. شىمكەنتكە كەلگەن بارلىق سپورتشىلار، جاتتىقتىرۋشىلار مەن تورەشىلەر پتر-تەستىلەۋدىڭ تەرىس ناتيجەلەرى بار انىقتامالاردى ۇسىندى. جارىس 31 قازانعا دەيىن جالعاسادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
