مالدارى ءالى دە قىرىلىپ جاتقان ماڭعىستاۋلىق شارۋالار نازىن ايتىپ، ەلوردادان ءبىر-اق شىقتى. العاش رەت ۇيىمداستىرىلعان شارۋالار قۇرىلتايىنا اقتوبە مەن قىزىلوردا وبلىسىنىڭ ازاماتتارى دا كەلگەن. بۇل تۋرالى ”ادىرنا” ۇلتتىق پورتالى “ينفورمبيۋرو” جاڭالىقتار باعدارلاماسىنا سىلتەمە جاساپ حابارلايدى.
شارۋالار مەملەكەتتەن بەرىلگەن 1,9 ميلليارد تەڭگە جۇعىم بولمادى دەپ اشۋلى. قۇرىلتايعا ولاردىڭ كەيبىرى قازاقى ناقىشتا كوستيۋم كيىم قولدارىنا قامشى ۇستاپ كەلىپتى. مالدارى رەسمي تىركەۋدە تۇرعاندارى تۇيەگە 9 مىڭ تەڭگە، جىلقى باسىنا 10 مىڭ تەڭگە العان. بىراق ول ارى-كەتسە 3 كۇندىك جەم-شوبىنە جەتكەن. الدا قىس، قازىردىڭ وزىندە مالىمىز قىرىلىپ جاتىر دەيدى.
“حالىقتىڭ ءبىرتالاي نەگىزگى جىلقىسى قىرىلدى. دالاعا ەندى مال ىزدەپ شىقپايتىن بولدىق. ءبارى قولىنا ۇستاپ وتىر. مەنىڭ سول قىرىق شاقتى تۇيەم بولعان. سول قىرىق شاقتى تۇيەدەن قازىر تورتەۋى عانا قالدى!” – دەيدى شارۋا قوجالىعىنىڭ يەسى نۇراسىل قارمىسوۆ.
شارۋالار رەسمي قىرىلعان مالدىڭ سانى 1207 ەمەس، كەمى 5 مىڭ باس دەپ وتىر. قولىندا ازىن-اۋلاق مالى بارلار تىركەلمەگەندىكتەن، رەسمي ەسەپكە الىنباعان. ال مال باسىنا 9-10 مىڭ تەڭگە ازدىق ەتەتىنىن دەپۋتاتتار دا ايتىپ وتىر.
“ەرەگەسكەندەي وسى جىلى 10 مىڭ تگ قىلىپ تاستاعان. كۇنى بۇگىنگە دەيىن ول قاراجات تا بەرىلگەن جوق! ەڭ بولماسا كوكتەمگە دەيىن شىعىپ كەتۋ ءۇشىن شارۋالارعا قارجى جاعىنان كومەكتەسۋ كەرەك”، – دەيدى قر پارلامەنتى ءماجىلىسىنىڭ دەپۋتاتى سامات مۇساباەۆ.
ال اۋىل شارۋاشىلىعى مينيسترلىگى ەگەر وبلىس اكىمى ۇكىمەت رەزەرۆىنەن جەم-شوپكە تاعى دا قاراجات سۇراسا، مينيسترلىك تاراپى قولداۋعا دايىن ەكەنىن ايتتى. بىراق قازىردىڭ وزىندە كاسپي الەۋمەتتىك كورپوراتسياسى ارقىلى جەم-شوپكە 5,3 ميللارد تەڭگە قاراستىرىلعان.
“24,1 ملن تونناعا جۋىق ءشوپ، 1,5 ملن توننا پىشەندەمە، 2 ملن توننادان استام سۇرلەم، 4,5 ملن توننا سابان، سونىمەن قاتار قۇنارلى جەم دە دايىندالعان بولاتىن. اكىمدىك ۋاقىتىندا تاراتىپ، ۇلەستىرەدى دەگەن سەنىمدەمىز”، – دەيدى قر اۋىل شارۋاشىلىعى مينيسترلىگىنىڭ ءباسپاسوز حاتشىسى دامير ەگىزباەۆ.
الايدا ماڭعىستاۋ وبلىستىق اكىمدىگىنىڭ شەنەۋنىكتەرى جاۋاپ بەرۋگە اسىعار ەمەس. وبلىس اكىمى نۇرلان نوعاەۆ ءىسساپاردا ءجۇر دەگەن اۋىلشارۋاشىلىعى باسقارماسىنىڭ باسشىسى بۇگىنگى شارۋالاردىڭ تالابىن مىندەتتى تۇردە ەسكەرەمىز دەپ سەندىردى.
“ادىرنا” ۇلتتىق پورتالى
