Maldary áli de qyrylyp jatqan mańǵystaýlyq sharýalar nazyn aıtyp, elordadan bir-aq shyqty. Alǵash ret uıymdastyrylǵan sharýalar quryltaıyna Aqtóbe men Qyzylorda oblysynyń azamattary da kelgen. Bul týraly ”Adyrna” ulttyq portaly “Informbıýro” jańalyqtar baǵdarlamasyna silteme jasap habarlaıdy.
Sharýalar memleketten berilgen 1,9 mıllıard teńge juǵym bolmady dep ashýly. Quryltaıǵa olardyń keıbiri qazaqy naqyshta kostıým kıim qoldaryna qamshy ustap kelipti. Maldary resmı tirkeýde turǵandary túıege 9 myń teńge, jylqy basyna 10 myń teńge alǵan. Biraq ol ary-ketse 3 kúndik jem-shóbine jetken. Alda qys, qazirdiń ózinde malymyz qyrylyp jatyr deıdi.
“Halyqtyń birtalaı negizgi jylqysy qyryldy. Dalaǵa endi mal izdep shyqpaıtyn boldyq. Bári qolyna ustap otyr. Meniń sol qyryq shaqty túıem bolǵan. Sol qyryq shaqty túıeden qazir tórteýi ǵana qaldy!” – deıdi sharýa qojalyǵynyń ıesi Nurasyl Qarmysov.
Sharýalar resmı qyrylǵan maldyń sany 1207 emes, kemi 5 myń bas dep otyr. Qolynda azyn-aýlaq maly barlar tirkelmegendikten, resmı esepke alynbaǵan. Al mal basyna 9-10 myń teńge azdyq etetinin depýtattar da aıtyp otyr.
“Eregeskendeı osy jyly 10 myń tg qylyp tastaǵan. Kúni búginge deıin ol qarajat ta berilgen joq! Eń bolmasa kóktemge deıin shyǵyp ketý úshin sharýalarǵa qarjy jaǵynan kómektesý kerek”, – deıdi QR Parlamenti májilisiniń depýtaty Samat Musabaev.
Al aýyl sharýashylyǵy mınıstrligi eger oblys ákimi úkimet rezervinen jem-shópke taǵy da qarajat surasa, mınıstrlik tarapy qoldaýǵa daıyn ekenin aıtty. Biraq qazirdiń ózinde Kaspıı áleýmettik korporaııasy arqyly jem-shópke 5,3 mıllard teńge qarastyrylǵan.
“24,1 mln tonnaǵa jýyq shóp, 1,5 mln tonna pishendeme, 2 mln tonnadan astam súrlem, 4,5 mln tonna saban, sonymen qatar qunarly jem de daıyndalǵan bolatyn. Ákimdik ýaqytynda taratyp, úlestiredi degen senimdemiz”, – deıdi QR Aýyl sharýashylyǵy mınıstrliginiń baspasóz hatshysy Damır Egizbaev.
Alaıda Mańǵystaý oblystyq ákimdiginiń sheneýnikteri jaýap berýge asyǵar emes. Oblys ákimi Nurlan Noǵaev issaparda júr degen aýylsharýashylyǵy basqarmasynyń basshysy búgingi sharýalardyń talabyn mindetti túrde eskeremiz dep sendirdi.
“Adyrna” ulttyq portaly
