ءۇشىنشى مەگاپوليستە ءىىى رەسپۋبليكالىق «قايىرىمدىلىق كەرۋەنى» بايقاۋىنىڭ قاتىسۋشىلارى ماراپاتتالدى. «تۇركىستان» سارايىندا وتكەن سالتاناتتى جيىندا تۋعان ولكەنى تۇلەتىپ، حالىقتىڭ الەۋمەتتىك جاعدايىن جاقسارتۋعا اتسالىسقان ىسكەر ازاماتتاردى قالالىق ءماسليحات حاتشىسى باحادىر نارىمبەتوۆ قۇتتىقتاپ، العىس حات تابىستادى.
– قوعامدا بولىپ جاتقان ءاربىر وقيعانىڭ ارتىندا ادام باسىنا تۇسكەن قايعى مەن مۇڭ، مەيىرىمدىلىك پەن ماحاببات تۇر. مەيىرىمدىلىك پەن ىنتىماق بىرىككەن كەزدە، توتەپ بەرە المايتىن قيىندىق بولمايدى. شىمكەنتتە دە وسىنداي ۇدايى يگى ءىستىڭ باسى-قاسىندا تابىلاتىن جاندار از ەمەس. ولاردىڭ قايىرىمدى ىستەرىن بارىنشا ناسيحاتتاپ، كورسەتۋىمىز كەرەك. قۋانىشتى ءھام جاقسىلىقتى بولىسكەن سايىن ارتادى. قالامىزدا جومارت جۇرەكتى جاندارىمىز كوپ. جاستاردى ىزگىلىكتە جارىسۋعا ۇيرەتۋىمىز كەرەك. قايىرىمدىلىق جاساۋ ءۇشىن اسىپ-تاسىپ باي بولۋدىڭ قاجەتى شامالى، ەڭ باستىسى، مەيىرىمدى جۇرەگىڭ مەن تازا نيەتىڭ بولسا جەتكىلىكتى، - دەدى باحادىر ءمادالىۇلى.
رەسپۋبليكالىق سايىسقا جالپى سانى 670 ءوتىنىم قابىلدانعان. ناتيجەسىندە، بەس نوميناتسيا بويىنشا 30 ادام جەڭىمپاز اتاندى. بايقاۋ جەڭىمپازدارى «تۋعان جەر»، «اسار»، «مەيىرىم جولىندا»، «باتىل جۇرەك»، «قايىرىمدىلىق تاريحى» سياقتى اتالىم بويىنشا انىقتالدى. مەيىرىمدىلىككە باستايتىن ىزگى جوباعا تۇڭعىش پرەزيدەنت قورى مەن قازاقستاننىڭ ىسكەر ايەلدەر قاۋىمداستىعى مۇرىندىق بولىپ وتىر.
ۇيىمداستىرۋشى ەلميرا سوزاقباەۆا شاھاردا «قايىرىمدىلىق كەرۋەنى» ءىV رەسپۋبليكالىق كونكۋرسىنا وتىنىمدەر قابىلداۋ باستالعانىن جەتكىزدى. بايقاۋعا قاتىسۋ ءۇشىن وتىنىمدەردى قابىلداۋ 30 قاراشاعا دەيىن جالعاسادى.
ازامات جاپپار
فوتو سەرىك قوساەۆ
