ءۇشىنشى مەگاپوليستە جىلدىڭ ەڭ اۋقىمدى سپورت باسەكەسىنىڭ ءبىرى دە بىرەگەيى – شىمكەنت مارافونى ءوتتى.
حالىقارالىق سايىس مەملەكەت باسشىسىنىڭ بۇقارالىق سپورتتى دامىتۋ تاپسىرماسىنا ساي قالا اكىمدىگىنىڭ قولداۋىمەن وتۋدە. قالا تۇرعىندارى مەن قوناقتارى ءتۇرلى قاشىقتىقتا جۇگىرۋدە. جارىسقا قاتىسۋشىلارعا قالا اكىمىنىڭ ورىنباسارى ماقسۇت يساحوۆ ساتتىلىك تىلەدى.
– بۇگىن شىمكەنتتە ۇلكەن مەرەكە! سپورتشىلارعا بارلىق قولايلى جاعداي جاساۋعا تىرىستىق. سىزدەرگە مۇحتارحان دىلدابەكوۆ، ءبىرجان جاقىپوۆ سەكىلدى وليمپيادا قاتىسۋشىلارى قولداۋ كورسەتۋگە كەلىپ وتىر. جانە قولداۋ كورسەتكەن قالا تۇرعىندارىنا العىس ايتامىز. شىمكەنت مارافونىنا قاتىسۋشىلارعا ساتتىلىك تىلەيمىز! قالا اكىمى مۇرات دۇيسەنبەكۇلى ايتەنوۆتىڭ اتىنان دۇعاي سالەم! – دەدى ماقسۇت يساحوۆ.
ايتا كەتەيىك، ءداستۇرلى شىمكەنت مارافونى بيىل بەسىنشى رەت وتۋدە. حالىقارالىق جارىستى "Royal" جانە "قاسيەت" فيتنەس-سپورت كلۋبتارى ۇيىمداستىرىپ، "ەۆريكا" سەكىلدى ساۋدا جەلىلەرى قولداۋ كورسەتەدى. بيىلعى سايىسقا قازاقستاننىڭ ءتۇرلى قالالارىنان عانا ەمەس، كورشى شەتەلدەردەن 2000-عا جۋىق اتلەت قاتىسىپ، ولار 5, 10, 21 جانە 42 شاقىرىمعا جۇگىرۋدە.
