«ۆولونتەر» تولىقمەتراجدى كينوفيلمىنىڭ تۇساۋكەسەرى ءوتتى

580

شىمكەنتتەگى جاستار رەسۋرستىق ورتالىعىندا «ۆولونتەر» تولىقمەتراجدى كينوفيلمىنىڭ تۇساۋكەسەر كورسەتىلىمى ءوتتى. ەل تاۋەلسىزدىگىنىڭ 30 جىلدىعىنا وراي رەجيسسەر سەرىك تالاسوۆتىڭ جاڭا تۋىندىسى كورەرمەنگە ۇسىنىلدى.

سالتاناتتى جيىنعا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان مەن قالالىق ءماسليحاتتىڭ حاتشىسى باحادىر نارىمبەتوۆ، زيالى قاۋىم وكىلدەرى، ءفيلمنىڭ رەجيسسەرى سەرىك تالاسوۆ جانە اكتەرلىك قۇرام، ۆولونتەرلىك ۇيىمداردىڭ وكىلدەرى، جوعارى جانە ورتا ارناۋلى وقۋ ورىندارىنىڭ ۆولونتەرلىك توپتارىنىڭ بەلسەندى جاستارى قاتىستى.

فيلمدە ەكى دوستىڭ وقيعاسى ارقىلى ەرىكتىلەردىڭ جۇمىسى سۋرەتتەلەدى. جاستاردىڭ پاتريوتتىق ساناسىن قالىپتاستىرۋ جانە ءوز ەلىنە دەگەن سۇيىسپەنشىلىگىن ارتتىرۋ ماقساتىندا تۇسىرىلگەن فيلم رەجيسسەردىڭ 50 تۋىندىسى.

كينوكورسەتىلىم سوڭىندا شىڭعىس جۇمابەكۇلى مەن باحادىر نارىمبەتوۆ ءسوز الىپ، رەجيسسەردىڭ تۋىندىسىنا باعاسىن بەردى.

– بۇل مەن كورگەن ءساتتى شىققان فيلمدەردىڭ ءبىرى دەر ەدىم. كينوماتوگرافياسىنا توقتالساق، بارلىق جانر قامتىلعان. سەرىكتىڭ تالانتتى كينوگەر ەكەنىن حالىق جاقسى بىلەدى. جاڭا تۋىندىسى قوعامداعى كوپتەگەن وزەكتى ماسەلەلەردى قوزعايدى. اكتەرلەر دە وزدەرىنە قويىلعان ميسسياسىن جاقسى الىپ شىققان. ارقايسىسىنىڭ كاسىبي مامان ەكەنىن سومداعان رولدەرىنەن كورۋگە بولادى. مۇنداي فيلمدەردى ۇلكەن ەكراندارعا شىعارۋعا ءوزىم دە اتسالىسامىن. الداعى ۋاقىتتا كينوتەاترلاردا ءفيلمدى كوپشىلىككە تاماشالاۋعا مۇمكىندىك جاسايمىز، - دەدى شىڭعىس مۇقان.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket