بيىل شىمكەنت قالاسىنىڭ ەكونوميكاسىنا 400 ميلليارد تەڭگە ينۆەستيتسيا تارتىلادى. ونىڭ ىشىندە شەتەلدىك جانە جەكە ينۆەستورلاردىڭ ۇلەسى 60 پايىزدى قۇرايدى.
بۇل تۋرالى YPO FORUM Shymkent «جاڭا جاعدايداعى بيزنەس» فورۋمىندا ءسوز سويلەگەن شىمكەنت قالاسىنىڭ اكىمى مۇرات ايتەنوۆ مالىمدەدى.
— بۇگىنگى فورۋم قازاقستان رەسپۋبليكاسى تاۋەلسىزدىگىنىڭ 30 جىلدىعىنىڭ قارساڭىندا ءوتىپ وتىر. وسى ورايدا، شىمكەنت قالاسىنىڭ تاۋەلسىزدىك جىلدارىندا جەتكەن جەتىستىكتەرىنە توقتالىپ وتكەن ءجون. بيزنەستى مەملەكەتتىك قولداۋ شارالارىنىڭ ارقاسىندا 30 جىلدا قالا ەكونوميكاسىنا 2 تريلليون 600 ميلليارد تەڭگە ينۆەستيتسيا تارتىلىپ، شاعىن جانە ورتا بيزنەس نىساندارىنىڭ سانى 87 مىڭعا جەتتى. وسى ۋاقىت ارالىعىندا 200-دەن استام كاسىپورىن اشىلىپ، 20 مىڭنان استام جۇمىس ورنى قۇرىلعان. تاۋەلسىزدىكتىڭ العاشقى كەزەڭىندە ءبىر جىلدا 460 ميلليون تەڭگە ينۆەستيتسيا تارتىلعان بولسا، بيىلعى جىلدىڭ 10 ايىنىڭ قورىتىندىسى بويىنشا بۇل كورسەتكىش 325 ميلليارد تەڭگەگە جەتتى. بۇل وتكەن جىلعى كورسەتكىشتەن 1.4 ەسەگە جوعارى. جىل سوڭىنا دەيىن قالا ەكونوميكاسىنا تارىلاتىن ينۆەستيتسيا كولەمى 400 ميلليارد تەڭگەگە جەتەدى دەپ كۇتىلۋدە، – دەدى قالا اكىمى.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، 2025 جىلعا دەيىن وڭدەۋ ونەركاسىبىندەگى ەكسپورت كولەمىن 1.5 ەسەگە، ال، ەڭبەك ونىمدىلىگىن 30 پايىزعا ارتتىرۋ قاجەتتىگىن ايتقان مۇرات دۇيسەنبەكۇلى وسى ماقساتقا قول جەتكىزۋ ءۇشىن ينۆەستورلار جانە بيزنەس قاۋىمداستىق وكىلدەرىمەن بىرلەسىپ جۇمىس ىستەپ جاتقانىن العا تارتتى.
ايتا كەتەيىك، YPO (Young Presidents Organization) – «الەمگە ۇزدىك كوشباسشىلار قاجەت» دەگەن ورتاق سەنىمگە نەگىزدەلگەن كورنەكتى باسشىلاردان تۇراتىن جاھاندىق قاۋىمداستىق. بۇل قاۋىمداستىققا الەمنىڭ 142 ەلىندەگى 30 مىڭنان استام ەڭ تابىستى ءارى ىقپالدى كاسىپكەرلەرى مۇشە. وعان مۇشە كومپانيالاردىڭ جىلدىق قارجى اينالىمى 9 تريلليون اقش دوللارىن قۇرايدى.
شىمكەنت قالاسىندا العاش رەت ۇيىمداستىرىلعان YPO فورۋمى RIXOS KHADISHA SHYMKENT قوناق ۇيىندە ءوتىپ جاتىر. قازاقستانداعى جەتەكشى كومپانيالار مەن بەدەلدى بيزنەسمەندەردى شىمكەنت قالاسىنىڭ ەكونوميكاسىنا ينۆەستيتسيا سالۋعا شاقىراتىن فورۋم ەكى كۇن بويى جالعاسادى.
فورۋم بارىسىندا Chocofamily Holding كومپانياسىنىڭ نەگىزىن قالاۋشى راميل مۋحورياپوۆ، «تاڭ مەديا گرۋپپ» ديرەكتورلار كەڭەسىنىڭ توراعاسى ارمانجان بايتاسوۆ، Bilim Media Group كومپانياسىنىڭ نەگىزىن قالاۋشى راۋان كەنجەحانۇلى، BI Group ديرەكتورلار كەڭەسىنىڭ توراعاسى جانە اكتسيونەرى ايدىن راحىمباەۆ جانە وزگەلەر ءسوز سويلەپ، شىمكەنت قالاسى ەكونوميكاسىنا ينۆەستيتسيا قۇيۋدىڭ تيىمدىلىگى جونىندە اڭگىمەلەدى.
