قر قارجى نارىعىن رەتتەۋ جانە دامىتۋ اگەنتتىگىنىڭ الدىنا ون بەسكە جۋىق ادام نارازىلىققا شىقتى، دەپ حابارلايدى “ادىرنا” ۇلتتىق پورتالى وردا.كز سايتىنا سىلتەمە جاساپ.
ايتۋلارىنشا، ولار يپوتەكانى ۋاقىتىلى تولەمەگەندىكتەن ۇيلەرىن بوساتۋعا ءماجبۇر بولعان. بانكتەر كەيبىر ۇيلەردى ءوز اتىنا زاڭداستىرىپ العان.
2016, 2017 جانە 2020 جىلدار ارالىعىندا باسپاناسىنان ايىرىلعان ادامدار نارازىلىق اكتسياسىنا شىقتى. ولاردىڭ اراسىندا مۇمكىندىگى شەكتەۋلى جاندار دا بار.
شەرۋشىلەر بانكتىڭ ارەكەتىن زاڭسىز دەپ سانايدى.
ۇيىنەن ايىرىلعانداردىڭ ءبىرى گۇلباقىش راقىمجانقىزىنىڭ ايتۋىنشا، ول 2006 جىلى يپوتەكا العان. يپوتەكانى تولەي الماعاندىقتان ۇيىنەن ايىرىلعان. قازىر ول بانك ءوز اتىنا ءبولىپ بەرگەن پاتەردە تۇرىپ جاتىر.
2007 جىلى حالىق بانكىنەن يپوتەكا العانبىز. قازىر يپوتەكانى تولەي الماي وتىرمىز، ەكىنشى توپتاعى مۇگەدەك بالام بار. يپوتەكالىق نەسيەنى وتەي الماعان سوڭ، بانك ءۇيدى ءوز اتىنا اۋداردى. شىدامىمىز تاۋسىلدى. ءبىز التاۋمىز. قازىر ءبىز بانك ءوز اتىنا جازىپ بەرگەن پاتەردە تۇرىپ جاتىرمىز. جالعىز مەن عانا ەمەس، كەلگەندەردىڭ بارلىعى ۇيلەرىن قايتارعىسى كەلەدى. بۇل ءبىزدىڭ باستى ماقساتىمىز. ىسكە جەكە سوت ورىنداۋشىلارى دا، بانكيرلەر دە قاتىستى، – دەيدى گۇلباقىش راقىمجانقىزى.
توپ حالىق بانكىنىڭ كەڭسەسىنە باراتىنىن حابارلادى. ايتۋلارىنشا، بانك قىزمەتكەرلەرى تەلەفون تۇتقاسىن كوتەرمەيدى. قارجى نارىعىن رەتتەۋ ورگانىنىڭ عيماراتىندا نارازىلىق بىلدىرۋشىلەر بانك قىزمەتكەرلەرىمەن قايتا-قايتا حابارلاسپاق بولعان. بىراق ولاردىڭ قوڭىراۋىنا ەشكىم جاۋاپ بەرمەدى.
“ادىرنا” ۇلتتىق پورتالى
