تۇركىستان وبلىسىنىڭ پوليتسەيلەرى تىيىم سالىنعان ماتەريالداردى تاراتقان كۇدىكتىنى ۇستادى، دەپ حابارلايدى “ادىرنا” ۇلتتىق پورتالى Zakon.kz سايتىنا سىلتەمە جاساپ.
تۇركىستان وبلىسى پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى ءدىني-ەكسترەميستىك باعىتتاعى يدەولوگيانى ناسيحاتتايتىن تىيىم سالىنعان ماتەريالداردىڭ ينتەرنەتتە تارالۋىنىڭ كەزەكتى جايتىن انىقتاپ، ونىڭ جولىن كەستى.
بۇل تۋرالى وبلىستىق پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ جەتكىزدى.
– الەۋمەتتىك جەلىلەرگە مونيتورينگ جۇرگىزۋ كەزىندە، “Facebook” پاراقشالارىنىڭ بىرىنەن بەلگىسىز ادامداردىڭ تىيىم سالىنعان ءدىني-ەكسترەميستىك ۇيىمنىڭ يدەولوگياسىن ناسيحاتتايتىن بەينەروليكتەر مەن ماتىندىك حابارلامالار جاريالاعانىن انىقتادى. اتالعان ماتەريالداردى دەپارتامەنتتە تىركەلىپ، ساراپتاماعا جولدادىق.
ناتيجەسىندە ساراپشىلار بۇل ماتەريالداردا تەرروريزم مەن ەكسترەميزمدى ناسيحاتتاۋدىڭ بەلگىلەرى بار ەكەنىن راستادى. وسىعان بايلانىستى ءبىز قر قك-ءنىڭ 256-بابى 2-بولىگىمەن (تەرروريزمدى ناسيحاتتاۋ نەمەسە تەرروريزم اكتىسىن جاساۋعا جاريا تۇردە شاقىرۋ) سوتقا دەيىنگى تەرگەۋدى باستادىق. تەكسەرۋ اياسىندا تۇركىستان وبلىسى پد ەكسترەميزمگە قارسى ءىس-قيمىل باسقارماسىنىڭ جەدەل ۋاكىلدەرى مەن تۇركىستان وبلىسى بويىنشا ۇقكد بىرلەسىپ، جەدەل-ىزدەستىرۋ ءىس-شارالارى ناتيجەسىندە كۇدىكتى رەتىندە ارىس اۋدانىنىڭ تۇرعىنىن ۇستادىق.
ۇستالعان ەر ادامنىڭ بۇرىن دەسترۋكتيۆتى-ءدىني اعىمنىڭ جاقتاۋشىسى جانە سوتتى بولعانىن انىقتادىق. ونىڭ ءۇيىن ءتىنتۋ كەزىندە، ءبىز ءارتۇرلى كومپيۋتەرلىك تەحنيكانى، تىيىم سالىنعان ءدىني ادەبيەتتەر، ۇيالى تەلەفون مەن ديسكىلەردى تاركىلەدىك.
قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. كۇدىكتىگە قاتىستى سوتپەن قاماۋعا الۋ تۇرىندەگى بۇلتارتپاۋ شاراسى تاڭدالدى. بۇگىندە ءىستىڭ ءمان-جايى جان-جاقتى انىقتالۋدا، – دەپ اتاپ ءوتتى پوليتسيا پودپولكوۆنيگى قۇرمانبەك ساحوۆ.
ءوز كەزەگىندە تۇركىستان وبلىسىنىڭ پوليتسەيلەرى ازاماتتارعا قر زاڭناماسىمەن تىيىم سالىنعان ءدىني-ەكسترەميستىك باعىتتاعى ماتەريالداردى، ونىڭ ىشىندە الەۋمەتتىك جەلىلەردە تاراتقانى ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى.
“ادىرنا” ۇلتتىق پورتالى
