15-ءشى قىركۇيەكتەن باستاپ العاشقى مەديتسينالىق-سانيتارلىق كومەك ۇيىمدارىنا ەركىن تىركەلۋ بويىنشا جىل سايىنعى ناۋقان باستالدى.
ول قاراشانىڭ 15-نە دەيىن جالعاسادى.
كەلەر جىلى ساپالى مەديتسينالىق كومەككە قول جەتكىزۋ ءۇشىن تۇرعىندار بۇگىننەن باستاپ ءوز تاڭداۋىمەن تۇرعىلىقتى جەرى بويىنشا ەمحاناعا تىركەلۋگە مۇمكىندىگى بار. بۇگىندە شىمكەنت قالاسىندا الەۋمەتتىك مەديتسينالىق ساقتاندىرۋ جۇيەسى بويىنشا 14 مەملەكەتتىك ەمحانا جانە 27 جەكەمەنشىك العاشقى مەديتسينالىق-سانيتارلىق كومەك ۇيىمدارى قىزمەت كورسەتەدى.
ءسابيت قۇرالبەك، «الەۋمەتتىك مەديتسينالىق ساقتاندىرۋ قورىنىڭ» شىمكەنت قالاسى بويىنشا فيليالىنىڭ ديرەكتورى:»تىركەۋ نەمەسە قايتا بەكىتۋ كەزىندە ەمحانانى تۇرعىلىقتى جەرىنە جاقىن جەردەن تاڭداۋ ۇسىنىلادى، قاجەت بولعان جاعدايدا ۋچاسكەلىك دارىگەر ناۋقاسقا ۇيگە بارا الادى. بۇل اسىرەسە پاندەميا كەزىندە وتە ماڭىزدى».
مەديتسينالىق ۇيىمدارعا تىركەلۋدىڭ ادىسىنە توقتالساق. ەلەكتروندىق ۇكىمەتتىك ۆەب-پورتالى ارقىلى ەگوۆ. كز.سايتىنىڭ دەنساۋلىق ساقتاۋ بولىمىندە «مەديتسينالىق-سانيتاريالىق العاشقى كومەك كورسەتەتىن مەديتسينالىق ۇيىمعا تىركەلۋ» قىزمەتىن تاڭداۋ قاجەت. ورىستەردى تولتىرۋ ارقىلى مەديتسينالىق ۇيىمعا ءوتىنىش بەرۋ كەرەك. پاتسيەنت تۋرالى مالىمەتتەردى ەمحانا مەملەكەتتىك اقپاراتتىق جۇيەلەردەن اۆتوماتتى تۇردە الادى. ەكىنشى ءادىسى ەمحاناعا جەكە كۋالىگىمەن تىكەلەي جۇگىنۋ. قازىرگى تاڭدا ەمحانالاردا بارلىق جاعداي جاسالعان دەيدى شاحاردىڭ باس دارىگەرى.
باقىتجان پوزيلوۆ، شىمكەنت قالاسىنىڭ دەنساۋلىق ساقتاۋ باسقارماسىنىڭ باسشىسى:»ينتەرنەت جۇيەسىنىڭ جۇمىسىنا قاتىستى كەمشىلىكتەر ورىن العان ەمحانالاردا قازىرگى تاڭدا ولار جويىلعان. ءبىز «قازاقتەلەكوم» جانە تاراتۋشى كومپانيالارمەن جۇمىس ىستەدىك. «سامال-3″شاعىناۋدانىنداعى №6 ەمحانادا ينتەرنەت جۇيەسى رەتكە كەلتىرىلدى. سونىمەن قاتار، بوزارىق ەلدىمەكەنىندەگى №10 ەمحاناداعى ينتەرنەت جۇيەسى، بادام1,2 دەگى دارىگەرلىك امبۋلاتوريالىق بەكەتتە دە قازىرگى تاڭدا ينتەرنەت جاقسى جۇمىس ىستەپ تۇر».
ەمحانا، مەديتسينالىق ۇيىمدارعا تىركەلۋ 15-ءشى قىركۇيەكتەن قاراشانىڭ 15-نە دەيىن جالعاسادى. تىركەلۋگە قولجەتىمدى ەمحانالاردىڭ تىزىمىمەن مىندەتتى الەۋمەتتىك-مەديتسينالىق ساقتاندىرۋ قورىنىڭ سايتىندا، ەمحانانى تاڭداۋ بولىمىندە تانىسۋعا بولادى
شىنار ورازوۆا
