شىمكەنتتە نىسانا كوزدەۋدەن ازيا چەمپيوناتىنىڭ اشىلۋ سالتاناتى ءوتتى. اتالمىش ءىس-شارا 10 قىركۇيەكتە باستالىپ، 20 قىركۇيەك كۇنى مارەسىنە جەتەدى. جارىستا 11 مەملەكەتتەن جينالعان 120-دان استام سپورتشى سىنعا تۇسەدى.
جيىنعا شىمكەنت قالاسىنىڭ اكىمى مۇرات ايتەنوۆ، سپورتتىق اتۋدان ازيا كونفەدەراتسياسىنىڭ پرەزيدەنتى شەيح سالمان ءال-ساباح قاتىسىپ، سپورتشىلارعا ساتتىلىك تىلەدى.
شىمكەنت قالاسىندا نىسانا كوزدەۋدەن ازيا بىرىنشىلىگى باستالدى. ءدۇبىرلى جارىسقا قاتىسۋشىلار «Shymkent Shooting Plaza» اتۋ كەشەنىندە باق سىناسادى. دوداعا قاتىسۋ ءۇشىن 120-دان استام سپورتشى 11 مەملەكەتتەن جينالىپ وتىر. مەرگەندەر سايىسى 10 كۇنگە سوزىلادى. ايتا كەتەيىك، سايىس بارىسىندا رەسمي دەلەگاتسيا، سپورتشىلار مەن قاتىسۋشىلار ءار 3 كۇن سايىن COVID-19-عا پتر تەستىن تاپسىراتىن بولادى.
مۇرات ايتەنوۆ، شىمكەنت قالاسىنىڭ اكىمى: «قالامىز وسىنداي جارىستاردى وتكىزۋ ءۇشىن بارلىق مۇمكىندىكتەر اشتى. زاماناۋي سپورتتىق كەشەندەر سالىنىپ، حالىقارىلىق دەڭگەيدەگى چنمپيونتتاردى وتكىزۋگە جاعداي جاسالۋدا. سپورت دوستىق پەن سىيلاستىقتى ارتتىرۋعا قىزمەت ەتەدى».
قۇرلىقتىق تۋرنيردە ەرەسەكتەر اراسىندا 10 مەترگە پنەۆماتيكالىق تاپانشامەن اتۋ سايىسىندا وتانداسىمىز ەلدار يمانقۇلوۆ جەڭىسكە جەتتى. اتالعان سايىس تۇرىنەن ەكىنشى ورىندى ساۋد ارابياسىنىڭ ازاماتى سوفار موحاممماد الدوساري يەلەنسە، ءۇشىنشى ورىن تايلاندتىق نوپپادون سۋتۆيرۋحقا بۇيىردى. سونداي-اق، تاپانشامەن 10 مەترگە نىسانا كوزدەۋدەن ياروسلاۆ ماحنەۆ باعىن سىنادى. وتانداسىمىز وزبەكستاندىق سپورتشى ۋميدبەك كامالبەكوۆكە ەسە جىبەرىپ، قولا جۇلدەنى مىسە تۇتتى.
يليا فەدين، نىسانا كوزدەۋدەن حالىقارالىق دارەجەدەگى سپورت شەبەرى: «مەن پاۆلودار قالاسىنان كەلىپ، قاتىسىپ وتىرمىن. بۇل سپورت تۇرىمەن اينالىسقانىما 15 جىلدان استى. قازاقستان رەسپۋبليكاسىنىڭ ۇلتتىق قۇراماسىنىڭ مۇشەسىمىن. وتكەن جىلعى دودادا كۇمىس جۇلدە يەلەنگەن ەدىم، بيىل جەڭىستەن ءۇمىتىم بار. شىمكەنت قالاسىندا ءوتىپ جاتقان چەمپيوناتتى جوعارى دەڭگەيدە دەپ ايتا الامىن».
قۇرلىقتىق تۋرنير بيىل 14-ءشى رەت ۇيىمداستىرىلىپ وتىر. نىسانا كوزدەۋدەن سايىس 20 قىركۇيەككە دەيىن جالعاسىن تابادى. بۇگىنگى تاڭدا ەل قورجىنىندا 1 التىن جانە 1 كۇمىس جۇلدە بار. اتالعان چەمپيونات ازيا اتۋ كونفەدەراتسياسى مەن قازاقستان سپورتتىق اتۋ فەدەراتسياسىنىڭ قولداۋىمەن ۇيىمداستىرىلىپ وتىر.
گۇلدانا داۋرەن
