تۇركىستان وبلىسى ارىس قالاسىندا اۋىل شارۋاشىلىعى تاۋارلارىن وڭدەۋ جانە ءوندىرۋ ءۇشىن ارنايى يندۋستريالىق ايماق قۇرىلادى. تۇرىك ينۆەستورلارى يندۋستريالىق ايماقتاعى جوبالارعا قىزىعۋشىلىق تانىتتى.
ماسەلەنى تالقىلاۋ ءۇشىن ارىس قالاسىنىڭ اكىمى گۇلجان قۇرمانبەكوۆا تۇركيالىق ءىرى ينۆەستور – VEFAS, Trolieum, Ankara, Renk-Yol جانە NC GLOBAL`S ينۆەستيتسيالىق كومپانيالار توبىنىڭ اتقارۋشى ديرەكتورى نەسيپ دۋرسۋنمەن كەزدەستى.
شاھار باسشىسى بۇل كەزدەسۋ مەملەكەت باسشىسىنىڭ بيىلعى جولداۋىندا ايتىلعان: «ينۆەستورلارعا كەشەندى قىزمەت كورسەتىپ، قولداۋ ءبىلدىرۋ قاجەت» دەگەن تاپسىرماسىنا وراي ۇيىمداستىرىلىپ وتىرعانىن اتاپ ءوتتى.
پرەزيدەنت جولداۋىندا ءبىلىم ساپاسىن ارتتىرۋ مەن اۋىل شارۋاشىلىعىن دامىتۋعا، جوعارى دەڭگەيدەگى قايتا وڭدەۋ ءىسىنىڭ جاڭا وندىرىستىك باعىتتارىن قۇرۋعا ەرەكشە نازار اۋدارعانى بەلگىلى.
وسى ماقساتتاعى جوبالاردى بىرلەسە جۇزەگە اسىرۋعا ينۆەستورلاردى قاتىستىرۋ كوزدەلگەن. كەزدەسۋگە ارىس قالاسى اكىمدىگى اپپاراتىنىڭ قىزمەتكەرلەرى مەن سالالىق ءبولىم باسشىلارى قاتىستى.
ناتسيونالنىي پورتال "ادىرنا"
