شىمكەنت قالاسىندا مۇمكىندىگى شەكتەۋلى جاندار ۇيدە-اق ءبىر مىڭنان استام مەملەكەتتىك قىزمەتتى الدى «ازاماتتارعا ارنالعان ۇكىمەت» مەملەكەتتىك كورپوراتسياسى مۇمكىندىگى شەكتەۋلى جاندارعا مەملەكەتتىك قىزمەتتەردى ۇيدە وتىرىپ كورسەتەدى.
ول ءۇشىن 1414 بىرىڭعاي بايلانىس ورتالىعىنا قوڭىراۋ شالىپ، سۇرانىس قالدىرساڭىز بولعانى. – 56 ساعات ىشىندە حقو قىزمەتكەرى ءوتىنىش بەرۋشىمەن حابارلاسىپ، كليەنتكە ىڭعايلى ۋاقىتتا ۇيىنە بارادى – دەپ اتاپ ءوتتى ايدوس اشەتوۆ «ازاماتتارعا ارنالعان ۇكىمەت» مەملەكەتتىك كورپوراتسياسى فيليال ديرەكتورىنىڭ ورىنباسارى.
– وسى ساناتتاعى ادامدارعا ءبىز ءوز دەنساۋلىعىمىزعا قاۋىپ توندىرمەۋگە جانە حقو-عا كەلمەي، مەملەكەتتىك قىزمەتتى ۇيدەن الۋ مۇمكىندىگىن پايدالانۋعا كەڭەس بەرەمىز. ولار ەڭ تانىمال جانە سۇرانىسقا يە قىزمەتتەرگە قول جەتكىزە الادى. اتاپ ايتقاندا، جەكە كۋالىكتى، سونداي-اق ەلەكتروندىق تسيفرلىق قولتاڭبا الۋ. مەملەكەتتىك كورپوراتسيا قىزمەتكەرلەرى كوروناۆيرۋس ىندەتىن ەسكەرە وتىرىپ، قىزمەت كورسەتۋ بارىسىندا بارلىق قاۋىپسىزدىك شارالارىن ساقتايدى. بارلىق مامان ماسكالارىن تاعىپ، انتيسەپتيكتەرمەن جابدىقتالعان.
«ازاماتتارعا ارنالعان ۇكىمەت» مەملەكەتتىك كورپوراتسياسى مۇگەدەكتەرگە مەملەكەتتىك قىزمەت كورسەتۋ جۇمىسىنا كوپ كوڭىل بولەدى. ازاماتتاردىڭ ۇيلەرىنە بارىپ مەملەكەتتىك قىزمەت كورسەتۋمەن قاتار، حقو ماماندارى ەستۋ جانە سويلەۋ قابىلەتى ناشار ادامدارعا مەملەكەتتىك قىزمەتتەردى كورسەتۋ ءۇشىن ىم-يشارا ءتىلىن مەڭگەرگەنىن اتاپ ءوتۋ قاجەت. جىل باسىنان بەرى شىمكەنت قالاسى بويىنشا فيليالىنىڭ قىزمەتكەرلەرى تۇرعىنداردىڭ ۇيىنە بارىپ، 1 مىڭنان استام مەملەكەتتىك قىزمەت كورسەتتى. مەملەكەتتىك قىزمەتتەردى ۇيدە وتىرىپ ءى جانە ءىى توپتاعى مۇگەدەكتەر، ۇلى وتان سوعىسىنىڭ قاتىسۋشىلارى مەن مۇگەدەكتىگى بار بالالار الا الادى.
"ادىرنا" ۇلتتىق پورتالى
