الماتىنىڭ №2 اۋەزوۆ اۋداندىق سوتى جەكە سوت ورىنداۋشىسىنىڭ ب.بايبەكتىڭ ار-نامىسىن، قادىر-قاسيەتىن جانە بەدەلىن قورعاۋ جونىندەگى سوت شەشىمىنىڭ جالعان ماتەريالداردى جويۋ جانە ءتيىستى تەرىسكە شىعارۋدى جاريالاۋ بولىگىندە تولىق ورىندالماۋى تۋرالى ءوتىنىشىن قاناعاتتاندىردى. بۇل تۋرالى زاڭگەر ايجان تاشەنوۆا جازدى، دەپ حابارلايدى «ادىرنا» ءتىلشىسى.
«سوت ماماي مەن يمانباەۆاعا ليتسەنزيالار، رۇقساتتار، ارنايى قۇقىقتار بەرۋگە تىيىم سالۋ، سونداي-اق مامايدىڭ جۇرگىزۋشى كۋالىگىنىڭ قولدانىلۋىن ۋاقىتشا توقتاتا تۇرۋ تۋرالى شەشىم شىعاردى. الايدا، يمانباەۆا ءۇشىن بۇل تارماق 2017 جىلى ونىڭ جۇرگىزۋشى كۋالىگىنىڭ قولدانىلۋ مەرزىمىنىڭ اياقتالۋىنا بايلانىستى وزەكتى ەمەس.
ەستەرىڭىزگە سالا كەتەيىن، بۇل شارالار سوت ورىنداۋشىسى تاراپىنان ىسكە اسىرىلۋدا. ولار زاڭنامادا «قۇقىق ۇستەمدىگى» قاعيداتىن قامتاماسىز ەتۋ ماقساتىندا ناقتى جازىلعان. زاڭ بارلىعىنا بىردەي»،– دەدى ول.
زاڭگەر سوت پروتسەسى تۋرالى دا اقپارات بەردى.
«سوت وتىرىسى كەزىندە يمانباەۆا قانداي دا ءبىر زاڭگەرلەردىڭ پىكىرىنە سىلتەمە جاساي وتىرىپ، رۇقسات بەرۋ قۇجاتتارىن شەكتەۋ بويىنشا قابىلداناتىن شارالاردىڭ زاڭسىزدىعى تۋرالى ماعىناسىز ريتوريكانى جالعاستىرعانىن اتاپ وتەمىن. مەن بۇعان دەيىن وسى ماسەلە بويىنشا ءتيىستى رەسمي تۇسىنىكتەمەلەر بەرگەن بولسام دا، ءسوز ۇقپايتىندارعا تاعى ءبىر رەت ءتۇسىندىرىپ وتەيىن. «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭدا ناقتى نەگىزدەمەلەر قاراستىرىلعان. سونىڭ ءبىرى – مۇلىكتىك ەمەس سيپاتتاعى تالاپتاردى ورىنداماۋ بولىپ تابىلادى. وعان 2 ينستانتسياداعى سوتتار قابىلداعان شەشىمدەر بويىنشا جالعان ۆيدەولاردى جويۋ جانە تەرىسكە شىعارۋ دا جاتادى.
الداعى ۋاقىتتا بورىشكەرلەرگە پروتسەستىڭ بارلىق قاتىسۋشىلارىنىڭ ۋاقىتىن ۇنەمدەۋدى جانە ولار ءۇشىن تولىقتاي تەگىن بەرىلەتىن ساپالى كەڭەس الۋ ءۇشىن دەرەۋ ماعان حابارلاسۋدى ۇسىنامىن.
جاۋاپكەرلەر مەن ولاردىڭ وكىلى ارەكەتىنىڭ قيسىنسىزدىعى تاعى دا تاڭ قالدىرۋدا. سوت ورىنداۋشىسى دۇرىس اتاپ وتكەندەي، ماماي مەن يمانباەۆا سوت شىعارعان شەشىمنىڭ ادىلدىگى مەن زاڭدىلىعىن مويىنداي وتىرىپ، سوت شىعىندارىن تولىق وتەگەن. ال ەندى ولاردىڭ شەشىمنىڭ باسقا بولىگىن ورىنداماۋ ارەكەتتەرى كەم دەگەندە قيسىنسىز ءارى ەش ناتيجەسىز.
تاشەنوۆانىڭ ايتۋىنشا، ماماي مەن ونىڭ زاڭگەرى ە.قاليەۆتىڭ ءىس-ارەكەتتەرىنىڭ قيسىنسىزدىعىنىڭ تاعى ءبىر مىسالى – سوت شەشىمىنىڭ ورىندالۋىن كەيىنگە قالدىرۋعا تىرىسۋى.
«كەشەگى وتىرىستا قاليەۆ جالا جاپقان ۆيدەونى جويۋدى جانە ونى جاريا تۇردە تەرىسكە شىعارۋدى كەيىنگە قالدىرۋ تۋرالى اۋداندىق سوتقا ءوتىنىش بەرگەنىنە بايلانىستى ءوندىرىستى توقتاتا تۇرۋ قاجەتتىلىگى تۋرالى ايتتى. بۇل دا ونىڭ سوت شەشىمىنىڭ ادىلدىگى مەن زاڭدىلىعىن تولىق مويىنداعانىن راستايدى!
«زاڭگەر» قاليەۆتىڭ سوت پروتسەسىنە قايتادان ەش دايىندىقسىز قاتىسقانىن ايتۋدىڭ ءوزى ىڭعايسىز. نەلىكتەن وعان سەنىم بىلدىرۋشىلەردىڭ جۇرگىزۋشى قۇقىعىن توقتاتا تۇرۋعا بولمايتىنى تۋرالى قورعاۋشى تاراپتىڭ پوزيتسياسىن قاراپايىم تۇردە ايتىپ جەتكىزۋ كەرەك بولاتىن.
وزدەرىنىڭ ءساتسىز جەڭىلىستەرىن جاسىرۋعا تىرىسقان ماماي مەن قاليەۆ تاعى دا سوت وتىرىسىنان كورىنىس ۇيىمداستىرۋعا تىرىستى. قايتادان بوس اۋرەشىلىككە سالىنىپ، جالعان «دالەلدەرىنە» جۇگىندى.
ناتيجەسىندە، مامايعا ەندى جاياۋ جۇرۋگە تۋرا كەلەدى. مەنىڭ ماماي مەن يمانباەۆاعا بەرەر كەڭەسىم – بۇدان بىلاي دا شەكتەۋ شارالارىنا ۇشىراماۋ ءۇشىن تەك سوت شەشىمىن تولىعىمەن ورىنداۋ قاجەت!
جاۋاپكەرلەرگە سالىنعان جاڭا سانكتسيالار ولاردىڭ ەسىن جيدىرىپ، ولار اقىرىندا دۇرىس شەشىم قابىلداپ، جالعان ماتەريالداردى جويىپ، وزدەرىنىڭ يۋتۋب-ارنالارىندا تەرىسكە شىعارۋدى جاريالايدى دەپ ۇمىتتەنەمىن.
ەگەر وسى تالاپ ورىندالسا، وندا بارلىق شەكتەۋلەر دەرەۋ الىنىپ تاستالادى. بۇلاي بولماعان جاعدايدا، ءبىز ولاردىڭ باستى «شوۋىنىڭ» - الماتى كوشەلەرىن سىپىرۋلارىنىڭ كۋاسى بولامىز»،— دەپ ءسوزىن قورىتىندىلادى ول.
