قر تاۋەلسىزدىگىنىڭ 30 جىلدىعىنا وراي مەگاپوليستەگى تەاترلاردا «قويىلىمدىق كوستيۋمدەر كورمەسى» ءوتتى. شىمكەنت قالالىق مادەنيەت، تىلدەردى دامىتۋ جانە ارحيۆتەر باسقارماسىنىڭ ۇيىمداستىرۋىمەن وتكەن شارادا تەاتر ۇجىمدارى ەڭ تاڭداۋلى قويىلىمداردىڭ ساحنالىق كيىم ۇلگىلەرىن ۇسىندى.
شىمكەنت قالالىق قۋىرشاق جانە جاسوسپىرىمدەر تەاترى مىسىر ەلىن بيلەگەن، قىپشاق دالاسىنىڭ ۇلى قاھارمانى سۇلتان بەيبارىسقا ارنالعان ر.وتارباەۆتىڭ «ساعىنىش ءشوبى»، ب.پارمانوۆتىڭ «الپامىس» جانە اباي قۇنانبايۇلىنىڭ 175 جىلدىعىنا وراي ساحنالانعان ا.التىنبەكوۆتىڭ «دارا تۇلعا» پوەتيكالىق دراماسىنىڭ ساحنالىق كيىمدەرى مەن كەيىپكەر قۋىرشاقتاردىڭ كورمەسىن ۇيىمداستىردى. بۇل كورمە قالا تۇرعىندارى مەن قوناقتارىنىڭ تەاتر تىنىسىمەن تانىسىپ، اسىل ونەرگە ءبىر تابان جاقىنداۋعا مۇمكىندىك بەردى.
ال، شىمكەنت قالالىق ءازىل-سىقاق جانە ساتيرا تەاترى كورمەگە امەريكاندىق دراماتۋرگ نيل سايموننىڭ الەم ادەبيەتىنىڭ ءىنجۋ-مارجانىنا اينالعان «اۋمەسەرلەر» كومەدياسىنداعى قويىلىمدىق كيىمدەرىن قويدى. سپەكتاكل قازاق تىلىندە تۇڭعىش رەت فارحادبەك قانافيننىڭ رەجيسسەرلىگىمەن ساحنالانعان بولاتىن. XX عاسىردىڭ 80 جىلدارىندا جازىلعان پەسا تاقىرىبى كۇنى بۇگىنگە دەيىن ءوزىنىڭ وزەكتىلىگىن جويعان ەمەس. «اۋمەسەرلەر» كومەدياسىندا كورىنىس جەلىسى ءبىر-بىرىمەن شيرىعا ءوربىپ، سوڭىندا ءبىلىمنىڭ كۇشى ماحابباتقا ۇلاسىپ، اۋمەسەر كەيىپكەرلەر ساۋ ادامعا اينالادى.
بەكزات ونەر ورداسى شىمكەنت قالالىق وپەرا جانە بالەت تەاترى رەپەرتۋارداعى ەڭ قىزىقتى كوستيۋم ۇلگىلەرىن ۇسىندى. قازاق وپەرا جاۋھارلارىنان م.تولەباەۆتىڭ «ءبىرجان سارا»، ت.جارمۇقامەدتىڭ «دومالاق انا»، ا.جۇبانوۆ پەن ل.ءحاميديدىڭ «اباي» جانە شەتەل كلاسسيكتەرىنەن دج.ۆەرديدىڭ «ريگولەتتو»، دج.ءروسسينيدىڭ «سەۆيلدىك شاشتاراز»، پ.ي.چايكوۆسكيدىڭ «ششەلكۋنچيك» قويىلىمدارىنداعى كيىمدەر ەسكيزدەرىمەن قوسا ۇسىنىلدى.
اتالمىش كورمە 12-18 قازان ارالىعىندا ءار تەاتردىڭ عيماراتىندا وتەدى. تەاتر سۇيەر قاۋىم كورمە اياسىندا ءتۇرلى قويىلىم كەيىپكەرلەرىنىڭ جانە ءار كەزەڭدەگى كيىم ۇلگىسىمەن تانىسا الادى.
زاميرا الدابەرگەنوۆا
فوتونى تۇسىرگەن س.قوساەۆ
