شىمكەنت: كىتاپ وقيتىن بۋككروسينگ بۇرىشى اشىلدى

1782
Adyrna.kz Telegram

تاۋەلسىزدىكتىڭ 30 جىلى اياسىندا شىمكەنت قالالىق ورتالىقتاندىرىلعان كوپشىلىك كىتاپحانالار جۇيەسىنە قاراستى اباي اتىنداعى كىتاپحانانىڭ باستاماسىمەن «كىتاپ وقيتىن شىمقالا» بۋككروسسينگ شاراسى ءوتتى.

جيىنعا اقىن س. نۇرمان، د. تاناباەۆ، «جاس قالامگەر» اقىندار كلۋبىنىڭ مۇشەلەرى قاتىستى.
— قالا تۇرعىندارىنىڭ كىتاپ وقۋعا دەگەن قىزىعۋشىلىعىن ارتتىرىپ، قازاق ادەبيەتىنىڭ ءىنجۋ-مارجاندارىن قولجەتىمدى ەتۋ ماقساتىندا بۋككروسسينگ بۇرىشتارى ۇيىمداستىرىلۋدا. شىلدە ايىندا قالاداعى اۋرۋحانالار مەن وڭالتۋ ورتالىقتارىندا اشىلعان بولاتىن. بۇگىن قاراتاۋ اۋدانىنىڭ اۋماعىندا س. بايتەرەكوۆ ەسكەرتكىشى مەن №130 جالپى ورتا مەكتەپ ماڭىندا ۇيىمداستىرىلىپ وتىر. بۇيىرتسا، الداعى اپتادا قالانىڭ باسقا اۋداندارىندا دا ۇيىمداستىرماقپىز،- دەيدى اباي اتىنداعى ورتالىق كىتاپحانانىڭ مەڭگەرۋشىسى ءنۇريلا جۇمانوۆا.

كوشەدەگى كىتاپ سورەسى قالا تۇرعىندارىن ادەبيەت وقۋعا عانا باۋلىماي، ادام بويىنداعى جاۋاپكەرشىلىك، ادالدىق، تازالىق سىندى قاسيەتتەردى دە قالىپتاستىرا تۇسەرى ءسوزسىز. سەبەبى، كىتاپ سورەسى ەش باقىلاۋسىز، اشىق الاڭدا ورنالاسقان.

ن. جۇمانوۆانىڭ ايتۋىنشا، كەز-كەلگەن قالا تۇرعىنى سورەدەگى قىزىقتىرعان ادەبيەتتى وقۋعا الىپ، قايتا ورنىنا اكەلسە بولدى.سونداي-اق، ۇيىندەگى وقىلعان ادەبيەتتەرىن بۋككروسسينگ بۇرىشىنا سىيعا دا قالدىرا الادى.
شارا قوناقتارى كىتاپحاناشىلاردىڭ كاسىبي مەرەكەسىمەن قۇتتىقتاپ، بۋككروسسينگ بۇرىشتارىنىڭ وقىرمانى كوبەيسىن دەگەن تىلەك ءبىلدىردى. جيىن تسيرك ونەرپازدارى مەن مەكتەپ وقۋشىلارىنىڭ كونتسەرتتىك باعدارلاماسىمەن جالعاستى.

زاميرا الدابەرگەنوۆا

پىكىرلەر