ەل تاۋەلسىزدىگىنىڭ 30 جىلدىعىنا وراي «ەلباسى اكادەمياسى» كورپوراتيۆتىك قورىنىڭ ۇيىمداستىرۋىمەن «ەلباسى جولى» ەكسپەديتسياسى شىمكەنتكە كەلدى. ەكسپەديتسيا قۇرامىندا تۇڭعىش پرەزيدەنت ن.نازارباەۆتىڭ «ەل ءۇمىتى» باستاماسى اياسىندا جۇزەگە اسىپ جاتقان جوبالاردىڭ ۇزدىك، ءارى بەلسەندى 10 قاتىسۋشىسى بار.
ەكسپەديتسيا تاۋەلسىزدىك جىلدارىندا ەلىمىزدىڭ جەتكەن جەتىستىگىن كەلەر ۇرپاققا دارىپتەپ، قر تۇڭعىش پرەزيدەنتى-ەلباسى ن.نازارباەۆتىڭ ساياسي ءومىر جولىن كەڭىنەن ناسيحاتتاۋ ماقساتىندا جولعا شىققان.
— «ەلباسى جولى» ەكسپەديتسياسى شامالعان اۋىلىنان باستاۋ الدى. رەسپۋبليكانىڭ تۇكپىر-تۇكپىرىنەن كەلگەن 14-29 جاس ارالىعىنداعى بەلسەندىلەر قاسكەلەڭ مەن الماتى قالاسىنا بارىپ، ەلباسى ن.نازارباەۆتىڭ «اتامەكەن» تاريحي-مادەني ورتالىعىنان ماڭىزدى ماعلۇماتتار الدى. ودان كەيىن ەلىمىزدىڭ رۋحاني استاناسى تۇركىستان قالاسىنا كەلىپ، «ەلباسى مەدالى» جوباسىنىڭ قاتىسۋشىلارىمەن كەزدەستىك. ەندى ەكسپەديتسيا شىمكەنتتەگى 5 جاسقا دەيىنگى ەرەكشە قاجەتتىلىگى بار بالالارعا ارنالعان «قامقورلىق» وڭالتۋ ورتالىعىنا كەلىپ وتىر، - دەيدى «ەلباسى اكادەمياسى» كق-نىڭ ءباسپاسوز حاتشىسى مادينا سۇلتانوۆا.
ن.نازارباەۆ قورىنىڭ «قامقورلىق» وڭالتۋ ورتالىعى شىمكەنتتە 2020 جىلى جەلتوقسان ايىنان باستاپ جۇمىس ىستەپ كەلەدى.
— ورتالىق ايىنا 30 بالاعا كومەك كورسەتە الادى. اشىلعان ۋاقىتتان بەرى 270 بالاعا كومەك كورسەتىلدى. شالعاي اۋدانداردان كەلگەن 221 بالا تاۋلىكتىك ستاتسيوناردا، 49 شىمكەنتتىك ءبۇلدىرشىن كۇندىزگى ستاتسيوناردا ەم قابىلدادى. ەمدەلۋشىلەردىڭ 45 پايىزىنىڭ قيمىل-قوزعالىسىن دامىتۋعا كومەكتەسسەك، 35 پايىزىنىڭ سويلەۋ قابىلەتى دامىدى. ورتالىق زاماناۋي قۇرال-جابدىقتارمەن قامتاماسىز ەتىلگەن. ماسەلەن، كسۆپ اپپاراتى ارقىلى بالانىڭ ەستۋ قابىلەتىندەگى اقاۋدى ەرتە انىقتاي الامىز. سونداي-اق، مۇندا بالالاردىن تسەرەبرالدى سال اۋرۋىنا ارنالعان وڭالتۋ جۇمىستارىن ەرتە كەزەڭنەن باستاۋعا مۇمكىندىك بار. ونىڭ بارلىعى دارىگەردىڭ نۇسقاۋىمەن، ارنايى باعدارلاما بويىنشا جۇزەگە اسىرىلادى، - دەيدى «قامقورلىق» وڭالتۋ ورتالىعىنىڭ ءبولىم مەڭگەرۋشىسى ءلاززات شەرالىقىزى.
ەكسپەديتسيا مۇشەلەرى وڭالتۋ ورتالىعىنداعى ەڭ وزىق زاماناۋي قۇرىلعىلاردى كورىپ، جەكە جانە توپتىق ساباق وتەتىن كابينەتتەرمەن تانىستى.
ايتا كەتەيىك، ەكسپەديتسيانىڭ 25-31 قازان ارالىعىنا جوسپارلانعان ساپارى تەمىرتاۋ مەن نۇر-سۇلتان قالالارىندا جالعاسپاق.
زاميرا الدابەرگەنوۆا
