شىمكەنت قالالىق وپەرا جانە بالەت تەاترى 30-31 قازان كۇندەرى تاۋەلسىزدىكتىڭ 30 جىلدىعىنا ۇلتتىق مۋزىكا جاۋھارى – ە.برۋسيلوۆسكيدىڭ قايتا جاڭعىرعان «قىز جىبەك» وپەراسىن ۇسىنباق. بۇل تۋرالى ونەر ورداسىندا وتكەن بريفينگتە تەاتر ديرەكتورى مايرا مۇحامەدقىزى مالىمدەدى.
– بيىل ەلىمىزدىڭ مۋزىكالىق-ساحنا الەمىندەگى تۇڭعىش قازاق وپەراسى "قىز جىبەكتىڭ" دۇنيەگە كەلگەنىنە – 87 جىل. بۇل وپەرا تۋىندىسى بارشا الەمدى سەلت ەتكىزىپ، ىقلاس-زەيىنىن وزىنە بىردەن تارتتى. "قىز جىبەك" بۇگىنگى كۇنى ۇلتتىق وپەرا ونەرىندە ەڭ ۇزاق باقىتتى ءومىر كەشكەن كەرەمەت تۋىندى. ۇلتتىق ونەرىمىزدىڭ التىن قورىنا ەنگەن 2 اكتىلى 4 كورىنىستى وپەرا شىمكەنتتە 2010 جىلى ا.التىنبەكوۆتىڭ رەجيسسەرلىگىمەن ساحنالانعان بولاتىن. اراعا جىلدار سالىپ، قويىلىمدى جاڭاشا ستيلدە قويۋ ماقساتىندا، شىمكەنت قالالىق وپەرا جانە بالەت تەاترىنا رەسەي فەدەراتسياسىنىڭ رەجيسسەرى ميحايل پاندجاۆيدزە ارنايى شاقىرتىلدى ،- دەدى م. مۇحامەدقىزى.
سپيكەردىڭ ايتۋىنشا، بۇل جولى ساحنادا ارۋ جىبەكتى سومدايتىن تۇركىستان مۋزىكالىق دراما تەاترىنىڭ ۆوكال ءارتىسى ايكەرىم شارىپبەك جانە تەاترىمىزدىڭ جاس ءسوليسى حالىقارالىق بايقاۋلاردىڭ لاۋرەاتى جۇلدىزاي مۇساەۆا - جىبەكتىڭ بويىنداعى نازىكتىك، سابىرلىلىق، بيازىلىق ت.ب. سەزىمدەرىنىڭ شىنايىلىعىن حالىق الدىندا كورسەتەتىن بولادى. جىبەكتىڭ تولەگەنى بولىپ شىمكەنت قالالىق وپەرا جانە بالەت تەاترىنىڭ كوركەمدىك جەتەكشىسى ءمادىحان دۋيسەەۆ ءوزىنىڭ ءان ورىنداۋ شەبەرلىگىمەن كورەرمەن كوڭىلىنەن ورىن تاپپاق.
بريفينگتە قويۋشى رەجيسسەر ميحايل پاندجاۆيدزە، قازاقستاننىڭ ەڭبەك سىڭىرگەن قايراتكەرى، «قۇرمەت» وردەنىنىڭ كاۆالەرى، ديريجەر ابزال مۋحيتدينوۆ، تەاتردىڭ باس بالەتمەيستەرى ريتا حايرۋشەۆا، قويۋشى سۋرەتشى باقىت كۇزەمباەۆ سىندى سپيكەرلەر جاڭا قويىلىمنىڭ ەرەكشەلىگى تۋرالى ايتتى.
شىمكەنت قالالىق وپەرا جانە بالەت تەاترىنىڭ ساحناسىندا جاڭا مۋزىكالىق رەداكتسيادا، رەجيسسەرلىق شەشىمدە، اكۋستيكالىق، كومپيۋتەرلىك، جارىق بەرۋ تەحنولوگياسىندا، پلاستيكالىق حورەوگرافيا تۇجىرىمداماسىندا، كەيىپكەرلەردىڭ ويناۋ، سويلەۋ، ءان ايتۋ تاسىلدەرى ارقىلى قازاقتىڭ ءداستۇرلى ورىنداۋشىلىق ەرەكشەلىكتەرىندە قويىلاتىن بولادى.
ا. جادىگەرۇلى
