شقو-دا بالالارعا ارنالعان ويىنشىق تاۋارلارعا مونيتورينگ جاسالىپ، ىشىنەن قاۋىپتى زاتتار تابىلدى، دەپ حابارلايدى "ادىرنا" ۇلتتىق پورتالى.
Arnapress.kz اقپاراتىنا سۇيەنسەك، سانيتارلىق-ەپيدەميولوگيالىق باقىلاۋ دەپارتامەنتى 3 مىڭنان استام سىناما الدى. سونىڭ ىشىندە ازىق-تۇلىك ونىمدەرى مەن حالىق ءجيى الاتىن تاۋارلار بار. تەكسەرىس كەزىندە يمپورتەرلەر مەن تاۋار وندىرۋشىلەرگە 2 377 355 تەڭگە كولەمىندە ايىپپۇل سالىندى. 166,2 كەلىگە تارتاتىن قاۋىپتى ونىمدەر تاركىلەندى.
تالاپقا ساي كەلمەيتىن تاۋارلار از ەمەس بولىپ شىقتى. ءونىم وندىرۋشىلەر كوپ جاعدايدا تاۋارعا قاتىستى تولىق اقپارات (ساقتاۋ مەرزىمى، ءوندىرۋشىنىڭ اتاۋى مەن مەكەنجايى، شىعارىلعان كۇنى، ساقتاۋ ۋاقىتى، سالماعى، ەنەرگەتيكالىق قۇندىلىعى، مەملەكەتتىك تىلدەگى اقپارات، ەاەو مەملەكەتتەرىنە ورتاق بەلگى مەن مەبيۋستى) جازبايدى.
ال بالالارعا ارنالعان ويىنشىقتاردىڭ قۇرامىندا ۋلى زاتتار انىقتالدى.
"زەرتحانادا بالالارعا ارنالعان ويىنشىقتارعا دا تالداۋ جاسالدى. سول كەزدە تاڭبالاۋدان بولەك قۇرامىندا فەنول مەن فورمالدەگيد سياقتى قاۋىپتى زاتتاردىڭ ءتيىستى نورمادان ءبىر-ءبىر جارىم ەسەگە كوپ بولىپ شىقتى. ودان بالالار ۋلانۋى مۇمكىن", - دەيدى سانيتار ماماندار.
سونىڭ ىشىندە "پاكەتتەگى ماشينا" (قىتاي), "BTG-029 ماشيناسى" ء(وندىرۋشى - Baby toys garden, وزبەكستان،), "قۋىرشاقتار ىدىسى" ء(وندىرۋشى -Polimer Plastic, وزبەكستان), يدەنتيفيكاتسيا بويىنشا "ىدىستار جيىنتىعى" (وزبەكستان، ءوندىرۋشى كومپانيا كورسەتىلمەگەن) جانە تاعى باسقا تاۋارلار بار.
بۇدان بولەك، مەرزىمى ءوتىپ كەتكەن ويىنشىقتار بار. سونىڭ ءبىرى - Donqshenq toys قۋىرشاعى (قىتاي). تاعى ەكى ويىنشىقتا ءوندىرۋشىنىڭ اتاۋى جازىلماعان.
ال "باربي" قۋىرشاعى مەن سىلدىرماق ءتيىستى تالاپتارعا ساي كەلمەيدى. سەبەبى وتكىر شەتتەرى مەن كەرتىكتەرى بار. بالالارعا جاراقات الىپ قالۋى مۇمكىن.
"ادىرنا" ۇلتتىق پورتالى
