بالا قۇقىقتارى جونىندەگى ۋاكىل دينارا زاكيەۆا مەشىت ۇستازىنىڭ كامەلەتكە تولماعان بالالاردى ۇرىپ-سوعۋ وقيعاسىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
«بۇل جاعداي مەنىڭ باقىلاۋىمدا. اتا-انانىڭ ەشقانداي شاعىمىمىز جوق دەگەنىنە قاراماستان، تەرگەۋ جۇمىستارى ءجۇرىپ جاتىر. قر قك 140 بابىنا سايكەس ءىس قوزعالدى. ءىىم ۆيتسە-ءمينيسترى ك. سۇنتاەۆ جانە وڭىرلىك بالا قۇقىقتارى جونىندەگى ۋاكىلمەن بايلانىستامىن. وڭىرلىك ۋاكىل وقيعا ورنىنا بارادى»،—دەدى ول.
ايتا كەتەيىك، بۇعان دەيىن الەۋمەتتىك جەلىدە مەكتەپ جاسىنداعى كىشكەنتاي ەكى بالانىڭ دەنە جاراقاتىن العان ۆيدەوسى قىزۋ تالقىلانىپ جاتقانىن جازعان ەدىك. بەينەجازبادا بالالاردى مەدرەسەدە حاديستەردى جاتتاماعانى ءۇشىن ۇرعاندىعى ايتىلادى. قازاقستان مۇسىلماندار ءدىني باسقارماسىنىڭ ءباسپاسوز حاتشىسى وقيعاعا قاتىستى تۇسىنىكتەمە بەردى. ايتۋىنشا، «تاسپاۋ ءسالىمباي» مەشىتىنىڭ ۇستازى وزگە تۇرمىستىق ماسەلەلەر بويىنشا اشۋلانىپ، ءوز ەموتسياسىن تىزگىندەي الماي، كامەلەتكە تولماعان بالالارعا قول جۇمساعان.
