الماتىدا جەكە سوت ورىنداۋشىسى اناسى تۇرمەدە وتىرعان 15 جانە 3 جاستاعى قىزداردى ۇيلەرىنەن كۇشتەپ شىعارىپ، باسپاناسىن ساتىپ جىبەرمەك بولعان، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.
بۇل تۋرالى ادۆوكات جوحار وتەبەكوۆ ءوزىنىڭ Facebook پاراقشاسىندا جازعان. انىقتالعانداي جەكە سوت ورىنداۋشىسى راسۋلوۆ اناسى سوتتالىپ كەتكەن بالالاردىڭ باسپاناسىن ءوز بەتىنشە باعالاپ، ساتۋعا قويماق بولعان.
ونىڭ باسپانانى الۋ تۋرالى بۇيرىعىنا مەدەۋ اۋداندىق سوتىنىڭ سۋدياسى مولداباەۆ شەشىم شىعارعان. الايدا قالالىق سوتتىڭ سۋدياسى باقىتجان ەلشىباەۆ مەدەۋ اۋداندىق سوتىنىڭ قاۋلىسىن بۇزىپ، شەشىمنىڭ كۇشىن جويدى. اتا-اناسىز قالعان ەكى قىزدىڭ ءۇيى وسىلايشا وزدەرىنە قالاتىن بولدى.
"جەكە سوت ورىنداۋشىسى اتقارۋ پاراعىن ورىنداۋ ءتاسىلى مەن ءتارتىبىن وزگەرتۋ تۋرالى ۇسىنىسپەن سوتقا جۇگىندى. جسو تالاپتارى ونىڭ وندىرىسىندە ي.-دان جانە باسقا دا سوتتالعانداردان جابىرلەنۋشى ك-نىڭ ماتەريالدىق زالالدىڭ پايداسىنا 46 ملن. تەڭگە سوماسىندا ورتاق تارتىپپەن ءوندىرىپ الۋ تۋرالى اتقارۋ پاراعىنىڭ بولۋىمەن نەگىزدەلگەن. بورىشكەردە (سوتتالعان ي.) باسقا مۇلىك پەن اقشا قاراجاتىنىڭ بولماۋىنا بايلانىستى سوت ورىنداۋشىسى الماتى قالاسىندا ورنالاسقان جىلجىمايتىن مۇلىكتەگى ½ ۇلەستەن ءوندىرىپ الۋدى سۇرادى. بۇل ۇيدە سوتتالۋشىنىڭ اپكەسى مەن بالالارى تۇرادى. ءبىرىنشى ساتىداعى سوتتىڭ ۇيعارىمىمەن جسو ۇسىنىسى قاناعاتتاندىرىلدى، بورىشكەر مۇلكىنىڭ ½ ۇلەسىنە ءوندىرىپ الىندى", - دەپ حابارادى الماتى قالالىق سوتىنىڭ ءباسپاسوز قىزمەتى.
سوت ورىنداۋشىسى باسپانانى مەنشىك يەلەرىنىڭ قاتىسۋىنسىز باعالاعان. قالالىق سوتتىڭ القاسى ءىستى قاراۋ بارىسىندا جەكە سوت ورىنداۋشى راسۋلوۆتىڭ مۇلىكتى باعالاۋ كەزىندە اسىعىستىق تانىتىپ، مەنشىك يەلەرى نەمەسە ولاردىڭ وكىلدەرىنىڭ قاتىسۋىنسىز جۇرگىزگەنىن انىقتادى.
مەدەۋ اۋدانىندا وتكەن العاشقى سوت ىسىنە بالالاردىڭ وكىلدەرى دە، تۇرمەدە جازاسىن وتەپ جاتقان يدەلشاەۆانى دا قاتىستىرماعان. ءىستىڭ اق-قاراسىن انىقتاماي جاتىپ شەشىم شىعارعان اۋداندىق سوتتىڭ سۋدياسى مەن سوت ورىنداۋشىسى ەندى جازالانادى.
ء"بىرىنشى ساتىداعى سوتتىڭ ۇيعارىمى جسو ۇسىنىمىن قاناعاتتاندىرۋدان باس تارتۋ تۋرالى جاڭا ۇيعارىم شىعارۋمەن جويىلدى. سونىمەن قاتار، جەكە سوت ورىنداۋشىلارىنىڭ وڭىرلىك پالاتاسىنىڭ اتىنا جەكە ۇيعارىم شىعارىلدى", - دەدى ۆەدومستۆودان.
قىزداردىڭ اناسى ديلارا يدەلشاەۆا الاياقتىق ارەكەتى ءۇشىن 5 جىلعا سوتتالىپ كەتكەن. اكەلەرى دە جوق.17 جاستاعى نارگيز يدەلشاەۆا بولسا قيىندىقتارعا قاراماستان وقۋىن جالعاستىرىپ، ءارى 3 جاستاعى ءسىڭىلىسىن دە باعىپ كەلگەن.
ال اتا-انا قامقورلىعىنسىز قالعان بالالار تۋرالى قالالىق ءبىلىم باسقارماسى ەشتەڭە بىلمەيتىن بولىپ شىقتى.
"سوت الماتى قالالىق ءبىلىم باسقارماسىنا سوتتالعان يدەلشاەۆا ديلارا ابدىراشيتقىزىڭ كامەلەتكە تولماعان بالالارىنا قورعانشى تاعايىنداۋدى مىندەتتەدى. مەدەۋ اۋداندىق قورعانشىلىق ورگانى بۇل سوت ۇيعارىمىن تەك 2021 جىلدىڭ قىركۇيەك ايىندا دينارا يدەلشاەۆانىڭ ءوز قولىنان العان. بۇعان دەيىن سوتتان نەمەسە ءبىلىم بەرۋ مەكەمەسىنىڭ اكىمشىلىگىنەن ولاردىڭ اتا-اناسىز قالعانى تۋرالى اقپارات تۇسپەگەن. بالالار الماتى قالاسى، ۋچيتەلسكايا كوشەسى 40-ءۇي مەكەن-جايىندا دينارا يدەلشاەۆامەن (سوتتالۋشى يدەلشاەۆانىڭ اپكەسى) بىرگە تۇرادى. نارگيز الماتىداعى رەسپۋبليكالىق جوعارى كوللەدجدە وقيدى، ال ءسىڭلىسى ونىڭ تاربيەسىندە. نارگيز كامەلەتتىك جاسقا تولعان بويدا ءسىڭلىسى اميرانى قامقورلىققا الىعىسى كەلەتىنىن ءبىلدىردى. بالالار دينارانىڭ قامقورلىعىندا بولادى. الداعى ۋاقىتتا بالانى بالاباقشاعا ورنالاستىرۋ ماسەلەسى شەشىلمەك", - دەدى ءبىلىم باسقارماسىنىڭ وكىلدەرى.
“ادىرنا” ۇلتتىق پورتالى
