Almatyda jeke sot oryndaýshysy anasy túrmede otyrǵan 15 jáne 3 jastaǵy qyzdardy úılerinen kúshtep shyǵaryp, baspanasyn satyp jibermek bolǵan, dep habarlaıdy “Adyrna” ulttyq portaly Stan.kz saıtyna silteme jasap.
Bul týraly advokat Johar Ótebekov óziniń Facebook paraqshasynda jazǵan. Anyqtalǵandaı jeke sot oryndaýshysy Rasýlov anasy sottalyp ketken balalardyń baspanasyn óz betinshe baǵalap, satýǵa qoımaq bolǵan.
Onyń baspanany alý týraly buıryǵyna Medeý aýdandyq sotynyń sýdıasy Moldabaev sheshim shyǵarǵan. Alaıda qalalyq sottyń sýdıasy Baqytjan Elshibaev Medeý aýdandyq sotynyń qaýlysyn buzyp, sheshimniń kúshin joıdy. Ata-anasyz qalǵan eki qyzdyń úıi osylaısha ózderine qalatyn boldy.
"Jeke sot oryndaýshysy atqarý paraǵyn oryndaý tásili men tártibin ózgertý týraly usynyspen sotqa júgindi. JSO talaptary onyń óndirisinde I.-dan jáne basqa da sottalǵandardan jábirlenýshi K-nyń materıaldyq zalaldyń paıdasyna 46 mln. teńge somasynda ortaq tártippen óndirip alý týraly atqarý paraǵynyń bolýymen negizdelgen. Boryshkerde (sottalǵan I.) basqa múlik pen aqsha qarajatynyń bolmaýyna baılanysty sot oryndaýshysy Almaty qalasynda ornalasqan jyljymaıtyn múliktegi ½ úlesten óndirip alýdy surady. Bul úıde sottalýshynyń ápkesi men balalary turady. Birinshi satydaǵy sottyń uıǵarymymen JSO usynysy qanaǵattandyryldy, boryshker múlkiniń ½ úlesine óndirip alyndy", - dep habarady Almaty qalalyq sotynyń baspasóz qyzmeti.
Sot oryndaýshysy baspanany menshik ıeleriniń qatysýynsyz baǵalaǵan. Qalalyq sottyń alqasy isti qaraý barysynda jeke sot oryndaýshy Rasýlovtyń múlikti baǵalaý kezinde asyǵystyq tanytyp, menshik ıeleri nemese olardyń ókilderiniń qatysýynsyz júrgizgenin anyqtady.
Medeý aýdanynda ótken alǵashqy sot isine balalardyń ókilderi de, túrmede jazasyn ótep jatqan Idelshaevany da qatystyrmaǵan. Istiń aq-qarasyn anyqtamaı jatyp sheshim shyǵarǵan aýdandyq sottyń sýdıasy men sot oryndaýshysy endi jazalanady.
"Birinshi satydaǵy sottyń uıǵarymy JSO usynymyn qanaǵattandyrýdan bas tartý týraly jańa uıǵarym shyǵarýmen joıyldy. Sonymen qatar, jeke sot oryndaýshylarynyń óńirlik palatasynyń atyna jeke uıǵarym shyǵaryldy", - dedi vedomstvodan.
Qyzdardyń anasy Dılara Idelshaeva alaıaqtyq áreketi úshin 5 jylǵa sottalyp ketken. Ákeleri de joq.17 jastaǵy Nargız Idelshaeva bolsa qıyndyqtarǵa qaramastan oqýyn jalǵastyryp, ári 3 jastaǵy sińilisin de baǵyp kelgen.
Al ata-ana qamqorlyǵynsyz qalǵan balalar týraly qalalyq bilim basqarmasy eshteńe bilmeıtin bolyp shyqty.
"Sot Almaty qalalyq Bilim basqarmasyna sottalǵan Idelshaeva Dılara Ábdirashıtqyzyń kámeletke tolmaǵan balalaryna qorǵanshy taǵaıyndaýdy mindettedi. Medeý aýdandyq qorǵanshylyq organy bul sot uıǵarymyn tek 2021 jyldyń qyrkúıek aıynda Dınara Idelshaevanyń óz qolynan alǵan. Buǵan deıin sottan nemese bilim berý mekemesiniń ákimshiliginen olardyń ata-anasyz qalǵany týraly aqparat túspegen. Balalar Almaty qalasy, Ýchıtelskaıa kóshesi 40-úı meken-jaıynda Dınara Idelshaevamen (sottalýshy Idelshaevanyń ápkesi) birge turady. Nargız Almatydaǵy Respýblıkalyq joǵary kolledjde oqıdy, al sińlisi onyń tárbıesinde. Nargız kámelettik jasqa tolǵan boıda sińlisi Amırany qamqorlyqqa alyǵysy keletinin bildirdi. Balalar Dınaranyń qamqorlyǵynda bolady. Aldaǵy ýaqytta balany balabaqshaǵa ornalastyrý máselesi sheshilmek", - dedi Bilim basqarmasynyń ókilderi.
“Adyrna” ulttyq portaly
