شىمكەنتتە وفيتسەرلەر قۇرامى اتتەستاتسيادان وتۋدە. قورعانىس ىستەرى جونىندەگى دەپارتامەنتتە قىزمەت اتقاراتىن 20-عا جۋىق وفيتسەر وسى سىناقتى ابىرويمەن الىپ شىعۋعا تىرىسۋدا.
اتتەستاتتاۋ دەپارتامەنت باستىعىنىڭ ءبىرىنشى ورىنباسارى – شتاب باستىعى پودپولكوۆنيك تاۋىرجان سماعۇلوۆتىڭ توراعالىعىمەن ءوتىپ جاتىر. ولار وفيتسەرلەردىڭ مۇندا اتقارىپ وتىرعان اسكەري لاۋازىمدارىنا سايكەستىگىن جانە ودان ءارى قىزمەتتە پايدالانۋ پەرسپەكتيۆالارىن ايقىندايدى.
اتاۋلى شارا وفيتسەرلەر قۇرامىنىڭ مورالدىق جانە پسيحولوگيالىق قاسيەتتەرىن زەردەلەيدى. سونداي-اق، ولاردىڭ جالپى اسكەري جارعىلارىن جانە لاۋازىمدىق مىندەتتەرىن، سىبايلاس جەمقورلىققا قارسى ءىس-قيمىل تۋرالى زاڭنامانى بىلۋىمەن قاتار، كاسىبي جانە دەنە دايىندىعىنان سىناقتار تاپسىرۋى دەڭگەيى دە تەكسەرىلدى.
ايتا كەتسەك، ەلىمىزدىڭ قارۋلى كۇشتەرىندەگى اتتەستاتتاۋ مىندەتتى تۇردە ءۇش جىلدا ءبىر رەت ۇيىمداستىرىلادى. وعان بارلىق ساناتتاعى وفيتسەرلەر قۇرامى قاتىستىرىلادى.
"ادىرنا" ۇلتتىق پورتالى
