قالاداعى №1 اۋرۋحانا بازاسىندا دارىگەرلەر ينسۋلت العان 69 جاستاعى ناۋقاستىڭ مي قان تامىرىن ميحروحيررۋگيالىق ادىسپەن تىگىپ بەردى. شىمكەنتتە العاش رەت جاسالعان وتانى ەلىمىزدىڭ ۇزدىك نەيروحيرۋرگى ەركىن مەدەتوۆ جاسادى.
ناۋقاس اتالعان ارۋرۋحاناعا جەدەل جاردەم قىزمەتىمەن جەتكىزىلگەن. ينسۋلت العان ناۋقاستى دارىگەرلەر انگيوگرافيالىق ادىسپەن تەكسەرىپ، قان تامىرىنداعى اقاۋدى انىقتاعان. پاتسيەنتتىڭ ءومىرىن امان الىپ قالۋ ءۇشىن دارىگەرلەر شۇعىل تۇردە ونى وتا زالىنا كىرگىزىپ، مي قانتامىرانا حيرۋرگيالىق ەم جاسادى.
–تەكسەرۋ كەزىندە ناۋقاستىڭ شات تامىرى ارقىلى ەنىپ، مي قان تامىرلارىن تەكسەردىك. تەكسەرۋدىڭ ناتيجەسىندە مي قان تامىرىنىڭ بىتەلگەنىن انىقتادىق. ميدىڭ سول ايماعىنا قاننىڭ جەتىسپەۋشىلىگىنە بايلانىستى جاڭادان تامىر تىگۋ قاجەت بولدى. سوندىقتان وسى وپەراتسيانى جاسادىق. بۇل وتانىڭ ماقساتى ميدىڭ قان جەتپەي تۇرعان ايماعىنا اينالما جول ارقىلى قان جەتكىزۋ،-دەيدى نەيروحيرۋرگ ەركىن جۇماعاليۇلى.
ناۋقاس قازىر ءوزىنىڭ جاعدايى جاقسى ەكەنىن، دارىگەرلەرگە، وسىنداي ۇلكەن مۇمكىندىك بەرگەن مەملەكەتتىك قولداۋعا العىسىن ايتىپ وتىر.
«اكەم ءۇشىن قاتتى ۋايىمدادىق. مۇنداي وپەراتسيا قالامىزدا جاسالاتىنىن بىلمەدىك. اكەمنىڭ جاعدايى قازىر جاقسى. دارىگەرلەرگە تاعى دا راقمەت» دەيدى ناۋقاستىڭ ۇلى قايرات اكەنوۆ.
ايتا كەتۋ كەرەك، مۇنداي وپەراتسيا 10 مىڭ دوللارعا باعالانادى. الايدا مىندەتتى الەۋمەتتىك مەديتسينالىق ساقتاندىرۋ كەزىندە قالانىڭ مەديتسينالىق مەكەمەلەرىندە حيرۋرگيالىق ەمدەۋ تەگىن كورسەتىلەدى.
مەملەكەت باسشىسىنىڭ تاپسىرماسى اياسىندا جوعارى بىلىكتى مەديتسينالىق كومەكتى دامىتۋعا ەرەكشە كوڭىل بولىنەدى. دەنساۋلىق ساقتاۋ سالاسىنداعى مەملەكەتتىك ساياساتتى جۇزەگە اسىرۋدا بيىل ەكى ينسۋلت ورتالىعى اشىلدى. بۇدان باسقا، قالالىق بيۋدجەتتەن مەديتسينالىق مەكەمەلەردىڭ ماتەريالدىق-تەحنيكالىق بازاسىن جاراقتاندىرۋعا 6,5 ملرد.تەڭگە ءبولىندى.
شىمكەنتتەگى ينسۋلتپەن اۋىراتىن ناۋقاستاردى ەمدەۋگە جاتقىزۋدى تالداۋ كەزىندە پاتسيەنتتەردىڭ تەك 7% عانا ءوزىن-ءوزى ەمدەۋ ارقىلى ستاتسيونارعا تۇسەتىنى جانە جەدەل مەديتسينالىق كومەك جەلىسى بويىنشا 87% ، پاتسيەنتتەردىڭ 5% ەمحانالار جەلىسى بويىنشا تۇسەتىنى جانە قالعان 1% باسقالاي جولمەن ستاتسيونارعا تۇسەتىنى انىقتالدى. سوندىقتان دارىگەرلەر اۋرۋدى ءورشىتىپ الماۋ ءۇشىن ەمحانالارعا ۋاقىتىندا بارىپ، ەم قابىلداۋ كەرەك ەكەنىن ەسكەرتەدى.
«ادىرنا» ۇلتتىق پورتالى
