ەل تاۋەلسىزدىگىنىڭ 30 جىلدىعى قارساڭىندا شىمكەنت قالاسىندا «اكەگە قاراپ ۇل وسەر» اتتى ءVى رەسپۋبليكالىق اكەلەر فورۋمى وتۋدە. وتباسى ينستيتۋتىن نىعايتۋ جانە ەر ادامداردىڭ وتباسىنداعى ءرولى مەن جاۋاپكەرشىلىگىن ارتتىرۋ ماقساتىندا ۇيىمداستىرىلعان فورۋمنىڭ اشىلۋىندا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان ءسوز سويلەپ، جيىننىڭ ماڭىزىن اتاپ ءوتتى.
—بۇگىندە قوعام اۋقىمدى ترانسفورماتسيانى باسىنان وتكىزۋدە. وسىلاي جەدەل وزگەرىپ جاتقان قوعامداعى ەر ازاماتتاردىڭ ورنى مەن ءرولى، ونىڭ موينىنداعى مىندەتتەر قانداي؟ ءححى عاسىر جاعدايىندا جاقسى اكەگە قانداي تالاپتار قويىلادى؟ بۇگىنگى فورۋم، مىنە، وسى ماسەلەلەردى اشىق تالقىلاۋىمەن ماڭىزدى دەپ ويلايمىن، – دەدى شىڭعىس جۇمابەكۇلى. – سونىمەن بۇگىنگى اكەلەردىڭ ەڭ ماڭىزدى ميسسياسى قانداي؟ مەنىڭ ويىمشا قازىرگى اكەنىڭ باستى مىندەتى – ايەلدەرى باقىتتى ەتۋ. سەبەبى، ايەل باقىتتى بولسا، بالا دا، وتباسى دا باقىتتى بولادى. ءتىپتى، ايەل باقىتتى بولسا، الەم باقىتتى دەسەك تە ارتىق ايتقاندىق ەمەس.
شىڭعىس جۇمابەكۇلى گەرري چەپمەننىڭ «ماحابباتتىڭ 5 ءتىلى» اتتى كىتابىن اعىلشىنشادان قازاق تىلىنە اۋدارتىپ جاتقانىن ايتتى.
—بۇل كىتاپتا اۆتور وتباسى باقىتتى بولۋى ءۇشىن مىناداي 5 ءتاسىلدى قولدانۋدى ۇسىنادى. ولار: جاقسى ءسوز ايتۋ، ۋاقىتتى مازمۇندى وتكىزۋ، سىيلىق بەرۋ، ءبىر-بىرىنە ادال قىزمەت ەتۋ جانە فيزيكالىق قارىم-قاتىناس. بۇگىنگى ەر ازاماتتار وسى بەس ماسەلەگە مۇقيات بولسا، جارى مەن بالالارىن باقىتتى ەتە الادى دەپ ويلايمىن. بۇل ءوز كەزەگىندە ەلىمىزدە وتباسى ينستيتۋتىنىڭ نىعايۋىنا ىقپال ەتەدى، – دەدى ش.جۇمابەكۇلى.
سونىمەن قاتار القالى جيىندا قر پارلامەنتى سەناتىنىڭ دەپۋتاتى، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى ءلاززات سۇلەيمەن، قر پارلامەنتى ءماجىلىسىنىڭ دەپۋتاتى باقىتبەك سماعۇل، قر اقپارات جانە قوعامدىق دامۋ ۆيتسە-ءمينيسترى اسقار وماروۆ، بۇۇ حالىقتىڭ قونىستانۋى سالاسىنداعى قورىنىڭ (يۋنفپا) قازاقستانداعى اتقارۋشى وكىلى رايىمبەك سەيسەماليەۆ ءسوز سويلەپ، فورۋم جۇمىسىنا ساتتىلىك تىلەدى.
شىمكەنت قالاسى اكىمدىگىنىڭ قولداۋىمەن «اكەلەر وداعى» رەسپۋبليكالىق قوعامدىق بىرلەستىگى ۇيىمداستىرعان فورۋمعا رەسپۋبليكانىڭ بارلىق قالالارى مەن وبلىستارىنان دەلەگاتتار قاتىسۋدا. اتاپ ايتقاندا، وتباسىلىق ساياساتقا جاۋاپتى ورتالىق جانە وڭىرلىك مەملەكەتتىك ورگانداردىڭ، قوعامدىق بىرلەستىكتەردىڭ، حالىقارالىق ۇيىمداردىڭ، قازاقستان مۇسىلماندارى ءدىني باسقارماسى مەن قازاقستان حالقى اسسامبلەياسىنىڭ جانە عىلىمي-ساراپشىلىق قاۋىمداستىقتىڭ وكىلدەرى اكەلەر ينستيتۋتىن دامىتۋ ماسەلەسىن بىرلەسىپ تالقىلاۋدا.
