اقمولا وبلىسىنداعى وبالى اۋىلىنىڭ تۇرعىندارى قازاقستاننىڭ ءار ايماعىنان كوشىپ كەلەتىن كوپبالالى وتباسىلاردى ىزدەيدى. تۇرعىندار ولارعا تەگىن ءۇي بەرىپ، مال دا ساتىپ اپەرەتىنىن ايتقان، دەپ حابارلايدى “ادىرنا” ۇلتتىق پورتالى “ينفورمبيۋرو” جاڭالىقتار قىزمەتىنە سىلتەمە جاساپ.
وبالى اۋىلى اۋدان ورتالىعى ششۋچە قالاسىنان 35 شاقىرىم جەردە ورنالاسقان. قازىر اۋىلدا بارلىعى 100-گە جۋىق وتباسى تۇرادى. توقسانىنشى جىلداردا توقىراۋ باستالعاندا تۇرعىنداردىڭ باسىم بولىگى قالاعا كوشكەن ەكەن. سودان بەرى وبالى اۋىلىنان قۇت كەتكەندەي. ءتىپتى بالالار ءبىلىم الاتىن جالعىز مەكتەپتىڭ دە جابىلۋى مۇمكىن. مۇنداعى باستى ماسەلە – بالا سانىنىڭ ازدىعى. سوندىقتان وبالى تۇرعىندارى اۋىلعا كوشىپ كەلەتىن ءار كوپبالالى وتباسىعا ءۇي بەرىپ، ازىن-اۋلاق مال ساتىپ اپەرۋگە دايىن ەكەنىن جەتكىزدى.
"اۋداننان كەلىپ، بالا سانى كوپ بولماسا مەكتەپتى جاباتىنىن ايتتى. اۋىلدا جول جاسالىپ، جارىق تا جۇرگىزىلدى. سۋدىڭ دا بەرىلگەنىنە ەكى جىل بولدى. ۇيلەرگە تارتىپ الدىق. جۇمىس تا بار", - دەدى اۋىل تۇرعىنى قانات بايماعامبەتوۆ.
وبالىدا ەگىن ەگۋمەن شۇعىلداناتىن ەكى شارۋاشىلىق بار ەكەن. ولار دا كوپ بالالى وتباسىلارعا كومەكتەسۋگە دايىن.
"وسى مەكتەپتى ساقتاپ قالايىق، ەلدى ساقتاپ قالايىق دەگەن ويمەن جينالعانبىز. بىزگە كوپ بالالى ءۇش-ءتورت وتباسى وسى ەلگە قونىس اۋدارىپ كەلسە، ءبىز اۋىل بولىپ كومەكتەسىپ، جاردەم ەتۋشى ەدىك", - دەيدى تۇرعىن نۇرلان عابدۋللين.
وبالى مەكتەبىندە 41 وقۋشى ءبىلىم الىپ، 15 مۇعالىم جۇمىس ىستەيدى. ءبىلىم ورداسىندا جوندەۋ جۇمىستارى جۇرگىزىلىپ، ەسىك-تەرەزەسى دە اۋىستىرىلعان.
"بالا سانى از بولعاندىقتان بيىل ورتا مەكتەپ نەگىزگى مەكتەپكە اۋىستى. بىلتىر 60 وقۋشى بولعان. بىزدە كوشەمىز دەگەن ادامدار بار. ەگەر ولار كەتەتىن بولسا، بالا سانى مۇلدە ازايادى", - دەپ مالىمدەدى وبالى نەگىزگى مەكتەبى ديرەكتورىنىڭ مىندەتىن اتقارۋشى قىمبات احمەتوۆا.
ايماقتا بالا سانىنىڭ ازدىعىنا بايلانىستى 5 مەكتەپ ءبىرجولا جابىلعان. تاعى 4 مەكتەپ ورتا مەكتەپتەن نەگىزگى مەكتەپكە اۋىسىپتى.
“ادىرنا” ۇلتتىق پورتالى
