Aqmola oblysyndaǵy Obaly aýylynyń turǵyndary Qazaqstannyń ár aımaǵynan kóship keletin kópbalaly otbasylardy izdeıdi. Turǵyndar olarǵa tegin úı berip, mal da satyp áperetinin aıtqan, dep habarlaıdy “Adyrna” ulttyq portaly “Informbıýro” jańalyqtar qyzmetine silteme jasap.
Obaly aýyly aýdan ortalyǵy ýche qalasynan 35 shaqyrym jerde ornalasqan. Qazir aýylda barlyǵy 100-ge jýyq otbasy turady. Toqsanynshy jyldarda toqyraý bastalǵanda turǵyndardyń basym bóligi qalaǵa kóshken eken. Sodan beri Obaly aýylynan qut ketkendeı. Tipti balalar bilim alatyn jalǵyz mekteptiń de jabylýy múmkin. Mundaǵy basty másele – bala sanynyń azdyǵy. Sondyqtan Obaly turǵyndary aýylǵa kóship keletin ár kópbalaly otbasyǵa úı berip, azyn-aýlaq mal satyp áperýge daıyn ekenin jetkizdi.
"Aýdannan kelip, bala sany kóp bolmasa mektepti jabatynyn aıtty. Aýylda jol jasalyp, jaryq ta júrgizildi. Sýdyń da berilgenine eki jyl boldy. Úılerge tartyp aldyq. Jumys ta bar", - dedi aýyl turǵyny Qanat Baımaǵambetov.
Obalyda egin egýmen shuǵyldanatyn eki sharýashylyq bar eken. Olar da kóp balaly otbasylarǵa kómektesýge daıyn.
"Osy mektepti saqtap qalaıyq, eldi saqtap qalaıyq degen oımen jınalǵanbyz. Bizge kóp balaly úsh-tórt otbasy osy elge qonys aýdaryp kelse, biz aýyl bolyp kómektesip, járdem etýshi edik", - deıdi turǵyn Nurlan Ǵabdýllın.
Obaly mektebinde 41 oqýshy bilim alyp, 15 muǵalim jumys isteıdi. Bilim ordasynda jóndeý jumystary júrgizilip, esik-terezesi de aýystyrylǵan.
"Bala sany az bolǵandyqtan bıyl orta mektep negizgi mektepke aýysty. Byltyr 60 oqýshy bolǵan. Bizde kóshemiz degen adamdar bar. Eger olar ketetin bolsa, bala sany múlde azaıady", - dep málimdedi Obaly negizgi mektebi dırektorynyń mindetin atqarýshy Qymbat Ahmetova.
Aımaqta bala sanynyń azdyǵyna baılanysty 5 mektep birjola jabylǵan. Taǵy 4 mektep orta mektepten negizgi mektepke aýysypty.
“Adyrna” ulttyq portaly
