Aqmola oblysyndaǧy Obaly auylynyŋ tūrǧyndary Qazaqstannyŋ är aimaǧynan köşıp keletın köpbalaly otbasylardy ızdeidı. Tūrǧyndar olarǧa tegın üi berıp, mal da satyp äperetının aitqan, dep habarlaidy “Adyrna” ūlttyq portaly “İnformbiuro” jaŋalyqtar qyzmetıne sılteme jasap.
Obaly auyly audan ortalyǧy Şuche qalasynan 35 şaqyrym jerde ornalasqan. Qazır auylda barlyǧy 100-ge juyq otbasy tūrady. Toqsanynşy jyldarda toqyrau bastalǧanda tūrǧyndardyŋ basym bölıgı qalaǧa köşken eken. Sodan berı Obaly auylynan qūt ketkendei. Tıptı balalar bılım alatyn jalǧyz mekteptıŋ de jabyluy mümkın. Mūndaǧy basty mäsele – bala sanynyŋ azdyǧy. Sondyqtan Obaly tūrǧyndary auylǧa köşıp keletın är köpbalaly otbasyǧa üi berıp, azyn-aulaq mal satyp äperuge daiyn ekenın jetkızdı.
"Audannan kelıp, bala sany köp bolmasa mekteptı jabatynyn aitty. Auylda jol jasalyp, jaryq ta jürgızıldı. Sudyŋ da berılgenıne ekı jyl boldy. Üilerge tartyp aldyq. Jūmys ta bar", - dedı auyl tūrǧyny Qanat Baimaǧambetov.
Obalyda egın egumen şūǧyldanatyn ekı şaruaşylyq bar eken. Olar da köp balaly otbasylarǧa kömektesuge daiyn.
"Osy mekteptı saqtap qalaiyq, eldı saqtap qalaiyq degen oimen jinalǧanbyz. Bızge köp balaly üş-tört otbasy osy elge qonys audaryp kelse, bız auyl bolyp kömektesıp, järdem etuşı edık", - deidı tūrǧyn Nūrlan Ǧabdullin.
Obaly mektebınde 41 oquşy bılım alyp, 15 mūǧalım jūmys ısteidı. Bılım ordasynda jöndeu jūmystary jürgızılıp, esık-terezesı de auystyrylǧan.
"Bala sany az bolǧandyqtan biyl orta mektep negızgı mektepke auysty. Byltyr 60 oquşy bolǧan. Bızde köşemız degen adamdar bar. Eger olar ketetın bolsa, bala sany mülde azaiady", - dep mälımdedı Obaly negızgı mektebı direktorynyŋ mındetın atqaruşy Qymbat Ahmetova.
Aimaqta bala sanynyŋ azdyǧyna bailanysty 5 mektep bırjola jabylǧan. Taǧy 4 mektep orta mektepten negızgı mektepke auysypty.
“Adyrna” ūlttyq portaly
