شىمكەنت قالالىق كلينيكالىق بالالار اۋرۋحاناسىندا دۇنيە كەلگەنىنە ءبىر كۇن بولعان سابيگە كۇردەلى وتا جاسالدى. شاقالاقتىڭ تىك ىشەگى ايماعىنان اقاۋ تابىلعان. وتا جاساماسا، ونىڭ ءومىر ءسۇرۋى ەكىتالاي ەدى، دەيدى مەديتسينا ماماندارى.
ساناۆياتسيا جەلىسىمەن پەريناتالدىق ورتالىققا بارعان بالالار اۋرۋحاناسىنىڭ ماماندارى نارەستەگە «تىك ىشەكتىڭ اترەزياسى» دياگنوزىن قويىپ، اسار شاعىناۋدانىنداعى بالالار اۋرحاناسىنا اۋىستىرادى. جاعدايى اۋىر بولعاندىقتان، ءسابي جانساقتاۋ بولىمىنە جاتقىزىلىپ، شۇعىل تۇردە وتا جاسالدى.
«شاقالاقتى ءبىر كۇننىڭ ىشىندە پەريناتالدىق ورتالىقتان اۋرۋحاناعا اۋىستىرىپ، تولىق تەكسەرۋدەن وتكىزدىك. تىك ىشەگى تولىق جەتىلمەي تۋعان، وپەراتسيا كەزىندە سول جاق بۇيىرىنەن كولوستوما شىعارىلدى. وپەراتسيا ءساتتى ءوتتى. شاقالاق اناسىمەن بىرگە اۋرۋحانادان شىعارىلدى. مۇنداي اقاۋمەن تۋعان سابيگە 24 ساعاتتىڭ ىشىندە وتا جاساماسا، ىشەكتەرى كەڭەيىپ، جىرتىلىپ كەتىپ، ءسابي شەتىنەپ كەتۋى مۇمكىن، — دەيدى بالالار حيرۋرگيا ءبولىمىنىڭ مەڭگەرۋشىسى ەرجان بايدۋللاەۆ.
ايتا كەتەيىك، اسار شاعىناۋدانىنداعى بالالار اۋرۋحاناسىنىڭ دارىگەرلەرى جىل باسىنان بەرى تىك ىشەكتىڭ اترەزياسىمەن تۋعان توعىز شاقالاققا ءساتتى وتا جاساعان. جالپى، مۇنداي دەرتكە شالدىققان بالاقايلارعا ءۇش كەزەڭدە كۇردەلى وتا جاسالادى. حيرۋرگيالىق ەمنىڭ ناتيجەسىندە تۋماسىنان اۋىر دەرتكە شالدىققان بالالار قالىپتى ومىرگە ورالا الادى.
شىمكەنت قالاسى اكىمدىگىنىڭ ءباسپاسوز قىزمەتى
